ޓެރަރިޒަމްގެ ގާނޫނަށް ސަރުކާރުން ހުށައެޅި އިސްލާހު މިއަދު ރައްޔިތުންގެ މަޖިލީހުން ފާސްކޮށްފައިވާއިރު، އެ އިސްލާހާ މެދު ވިލިނގިލި ދާއިރާގެ މެމްބަރު ސައުދު ހުސެއިންގެ ކަންބޮޑުވުންތަކެއް ހިއްސާކޮށްފިއެވެ.
ކުރީގެ ރައީސް ޔާމީންގެ ވެރިކަމުގައި 12 މެމްބަރެއްގެ ގޮނޑި ގެއްލުވާލިއިރު އެ 12 މެމްބަރުންގެ ތެރޭގައި ހިމެނިވަޑައިގެންނެވި ސައުދު ވިދާޅުވީ، އޭރުގެ ސަރުކާރުން ސިޔާސީ ފަރާތްތަކަށް ޓެރަރިޒަމްގެ ދައުވާކުރިއިރު ތިބި ފުލުހުންނާއި ޕްރޮސެކިއުޓަރުން މިހާރުވެސް މަގާމުތައް ފުރުއްވަމުން ގެންދަވާ ކަމަށެވެ.
މިއަދު އިސްލާހު ކުރި ޓެރަރިޒަމްގެ ގާނޫނު ސިޔާސީކޮށް، ސިޔާސީ ބޭނުމަށް މިސަރުކާރުން ނުނެގި ނަމަވެސް، ފުރުސަތެއް ލިބުމުން މިގާނޫނުގެ ނާޖާއިޒު ފައިދާ ނަގައިގެން ސިޔާސީ ބޭފުޅުންނަށާއި އިލްމުވެރިންނަށް ނުރައްކާ ހަތިޔާރަކަށް ވެގެން ދާނެ ކަމަށެވެ.
ޔާމީންގެ ވެރިކަމުގައި ކުރި މުޒާހަރާއެއްގައި ޓެރަރިޒަމަށް ހިތްވަރުދޭ ވާހަކަ ދެއްކި ކަމަށް ބުނެ މިހާރުގެ ހޯމް މިނިސްޓަރ އިމްރާން އަބްދުﷲ ވަނީ 12 އަހަރު ދުވަހުގެ ޖަލު ހުކުމެއް އިއްވާފައެވެ. ރިޔާސީ އިންތިޚާބުން ޔާމީން ނާކާމިޔާބުވެވަޑައިގެންނެވުމުން އެހުކުމް ބާތިލުކޮށްފައިވާއިރު އިމްރާން ވަނީ މިސަރުކާރުން މިގާނޫނުގެ ބޭނުން ނާޖާއިޒު ގޮތުގައި ނުހިފާނެ ކަމަށެވެ.
ނަމަވެސް މިއީ ޓެރަރިޒަމް ހުއްޓުވުމަށް ސަރުކާރުން ކުރާ މަސައްކަތުގައި ލިބުނު ވަރަށް ބޮޑު ކުރިއެރުމެއް ކަމަށް ވިދާޅުވިއެވެ. މިމަހުގެ އެއްވަނަ ދުވަހު މަރުތަކާ ބެހޭ ރިޔާސީ ކޮމިޝަންގެ ރައީސް ހުސްނުއް ސުއޫދު ދެއްވި ނޫސް ކޮންފަރެންސެއްގައި ވިދާޅުވީ ބޭރުގެ ބޮޑު ޓެރަރިސްޓު ދެ ޖަމިއްޔާއެއްގެ ގޮތްޕެއް ރާއްޖޭގައި ހަރަކާތްތެރިވަމުން އަންނަ ކަމަށެވެ.
އަދި އެކަމުގައި ޝާމިލްވާ އިސް މީހުން ދަނެގަނެވިފައިވާ ކަމަށްވެސް ސުއޫދު ވިދާޅުވިއެވެ. ދާދި ފަހުން ފުލުހުން ހިންގި ޚާއްސަ އޮޕަރޭޝަނެއްގައި މާލެއާއި އައްޑޫގެ ގިނަ ފިހާރަތަކާއި ގެތަކެއް ވަނީ މިކަމާ ގުޅިގެން ބަލާ ފާސްކޮށްފައެވެ.