މީގެ ތިން އަހަރު ކުރިން، 2016 ވަނަ އަހަރުގެ މާޗް މަހުގެ ދެވަނަ ދުވަހު މަރާލުމަށް ފަހު ހިތަދޫ އަލަ އޮޅަކަށް އެއްލާލާފައި އޮތް ސ. ހިތަދޫ ބުރުނީގެ، އަލީ އަބްދުﷲ ގެ މަރުގެ މައްސަލާގައި ދައުލަތުން ދައުވާ އުފުލާފައިވާ ސ. ހިތަދޫ، ނަޝީދީގެ މުހައްމަދު ޝިފާޒާ ދެކޮޅަށް އިއްޔެ ކްރިމިނަލް ކޯޓުގައި ބޭއްވި އަޑުއެހުމެއްގައި ދެ ފުލުހެއްގެ ހެކިބަސް ޝަރީއަތަށް ނަގައިފިއެވެ.
އެގޮތުން އެއް ފުލުހަކީ އަލީގެ މަރުގެ މައްސަލަ ތަހުގީގު ކުރުމަށް މާލެއިން އައްޑުއަށް ދިޔަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ ފުލުހެކެވެ. އޭނާގެ ހެކިބަހުގައި ބުނެފައިވަނީ އަލީ ޝިފާޒް ދިރިއުޅެމުން ދިޔަ ސ. ހިތަދޫ ނަޝީދީގެ ގޯތި ތެރެއިން ރަބަރު ކޮތަޅެއްގައި ބަންދުކުރުމަށް ފަހު ވަޅުލާފައިހުރި ފައިސާތަކެއް ކޮނެގެން ނެގި ކަމަށެވެ.
ކޯޓު އަމުރަކާއެކު ފުލުހުން އެގެއަށް ވަދެފައިވާއިރު ފައިސާ ހުރި ތަން ބުނުމުގެ އިތުރުން ޝިފާޒް ވަނީ ވަޅުލާފައިހުރި ތަނުން ފައިސާ ކޮނެގެން ނަގާފައި ކަމަށް ފުލުސް މީހާ ހެކިބަސް ދިނެވެ. އެތަނުން ނެގި ފައިސާގެ ތެރޭގައި 40،095 ރުފިޔާ އާއި 20 ޑޮލަރު ހުރި ކަމަށް ފުލުސް މީހާ ބުންޏެވެ. ޝިފާޒް ބުނެފައިވަނީ އެފައިސާ އަކީ، މިމައްސަލާގައި ގަސްދުގައި މީހަކު މެރުމުގައި ބައިވެރިވި ކަމުގެ ދައުވާ އުފުލާފައިވާ ސ. ހިތަދޫ، ހެޕީ ފިއުޗާ، އަހުމަދު އިބްރާހިމް ދީދީ، އަލީ މަރާލުމުގައި ކަންތައްތަކުގެ ތެރެއިން ހަވާލުކުރި ފައިސާ ކަމަށް ވެސް ޝިފާޒް ތަހުގީގަށް ކިޔާދިން ކަމަށް ފުލުސް މީހާ ހެކިބަސް ދިނެވެ.
ދެންވެސް ފުލުހެއްގެ ހެކިބަސް ނަގާފައިވާއިރު އޭނާ ކައިރިން ދައުލަތުގެ ވަކީލު ސުވާލުކުރީ ޝިފާޒު ދަންނަތޯއެވެ. ޖަވާބުގައި ފުލުސް މީހާ ބުނެފައިވަނީ ޑިއުޓީގައި އުޅޭއިރު ފެންނަ ކަމަށާއި، އަދި ދަންނަ ކަމަށެވެ. އަލީ މަރުވި ކަން އެނގުނީ އެދުވަހު ހެނދުނު ހަށިގަނޑު ފެނުމުން ކަމަށް ވެސް ފުލުސް މީހާ ހެކިބަސް ދިނެވެ.
ދައުލަތުން ޝިފާޒުގެ މައްޗަށް ދައުވާ ކުރަނީ ގަސްދުގައި މީހަކު މެރުމުގައި ބައިވެރިވި ކަމުގެ ދައުވާއެވެ.