ފުވައްމުލަކުގައި ސަރުކާރުން އެޅި ފްލެޓުތަކުގެ އަގު ކަނޑައެޅިއިރު އަތްނުފޯރާ ފަށަށް އަގު ބޮޑުވުމުން އެސިޓީގެ ރައްޔިތުން މުޒާހަރާ ކުރުމަށް ތައްޔާރުވާން ފަށައިފިއެވެ.
ފުވައްމުލަކުން "އައްޑޫލައިވް" އާ ވާހަކަ ދެއްކި މީހަކު ބުނެފައިވަނީ ފްލެޓު ލިބުނުއިރު ޑައުން ޕޭމަންޓަށް އެކަނި 20،000ރ. ދައްކަން ޖެހޭ ކަމަށެވެ. އަދި މަހު ކުއްޔަށް ކޮންމެ މަހަކު 3،800ރ. ގެ އިތުރުން މެއިންޓެންސް ފީގެ ގޮތުގައި 800ރ. ދައްކަން ޖެހޭތީ ރަށު ރައްޔިތުން ވަނީ ކަންބޮޑުވުން ފާޅުކޮށްފައެވެ.
މިއަދު ސިޓީ ކައުންސިލާއި ބައެއް ރައްޔިތުން ބައްދަލުކޮށް ކަންބޮޑުވުންތައް ހިއްސާ ކޮށްފައިވާއިރު އަގުގެ މައްސަލައަށް ހައްލެއް ނުލިބިއްޖެނަމަ މުޒާހަރާ ކުރަންވެސް ތައްޔާރަށް ތިބި ކަމަށް މައުލޫމާތު ދިން ފަރާތުން ކިޔާދީފައިވެއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ރާއްޖޭގެ އެކި ކަންކޮޅުތަކުގައި އެޅި ފްލެޓުތަކުގެ އަގު ބޮޑުކަން ރައީސް އިބްރާހިމް މުހައްމަދު ސޯލިހް ވަނީ އެމަނިކުފާނު ޔޫއެންއަށް ފުރާ ވަޑައިގަތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ވެސް ފާހަގަކުރައްވާފައެވެ.
ރައީސް ވިދާޅުވީ ކުރީ ސަރުކާރުގެ ބޯހިޔާވަހިކަމުގެ ދަށުން ފްލެޓު އެޅީ ދެކޮޅު ޖެހޭ ގޮތަކަށް ނޫން ކަމަށާއި ފްލެޓުތައް ލިބުނު ފަރާތްތަކަށް ފްލެޓުތަކަށް ދައްކަން ޖެހޭ ޑައުން ޕޭމެންޓު ދެއްކުން ދަތިކަމަށް އެމަނިކުފާނު ވިދާޅުވިއެވެ. ރައީސް ވަނީ ސަރުކާރުން އެކަމުގައި ރައްޔިތުންނަށް ލުޔެއް ހޯދައިދިނުމުގެ ގޮތުން މަސައްކަތް ކުރަމުން އަންނަ ކަމަށެވެ.