ރިޔާސީ އިންތިހާބަށް ކެމްޕޭން ކުރަމުން އަންނަ އެ ޕާޓީގެ ކެންޑިޑޭޓާއި ރަނިން މޭޓް ބައިވެރިވެ ވަޑައިގަންނަވާ ޖަލްސާއެއް މިރޭ ސ. ފޭދޫގައި އޮންނާނެ ކަމަށް އެ ޕާޓީން ބުނެފި އެވެ.
ޕީޕީއެމް ފޭދޫ ޖަގަހަ ކުރިމަތީގައި އޮންނަ ހުސް ބިމުގައި މިރޭ ޖަލްސާ ބާއްވާ އިރު، ރޭ ހިތަދޫގައި ހުޅުވަން އުޅުނީ ޕީޕީއެމްގެ ހިތަދޫ ޒުވާނުންގެ ޖަގަހަ ހުޅުވުން ރޭ ވަނީ ކެންސަލްކޮށް އެވެ.
އެކަން ކެންސަލް ކުރީ، ކުރީގެ އެޓޮލް މިނިސްޓަރު އަބްދުﷲ ހަމީދުގެ އަނބިކަނބަލުން އިއްޔެ ލަންކާގައި އަަވަހާރަވުމާ ގުޅިގެން، ޖަނާޒާގައި ބައިވެރިވެ ވަޑައިގަތުމަށް ޔާމީން އިއްޔެ ހަވީރު އައްޑޫން ފުރާވަޑައިގަތުމާ ގުޅިގެންނެވެ.
އެހެން ނަމަވެސް މިއަދު މެންދުރު ފަހު ޔާމީން އައްޑު އަށް ވަޑައިގެން މި ރޭ 8:00 ޖަހާ އިރު ޒުވާނުންގެ ޖަހަގަ ހުޅުއްވައި ދެއްވާނެ ކަމަށް ޕީޕީއެމުން ބުންޏެވެ. އެއަށް ފަހު ފޭދޫގައި ޖަލްސާ ކުރިއަށް ގެންދާނެ އެވެ.
ޔާމީން އިއްޔް ފުރާވަޑައިގެންނެވި ނަމަވެސް ރަނިންމޭޓް ޑރ. މުހައްމަދު ޖަމީލް އަހުމަދު މަޑު ކުރައްވައި، ޕީޕީއެމްގެ ރަށްރަށުގެ ޖަގަތަކަށް ޒިޔާރަތް ކުރައްވައި، ޕާޓީ އަށް މެމްބަރު އިތުރު ކުރެއްވުމުގެ މަސަައްކަތް މިހާރު ވެސް ގެންދަވަނީ ކުރައްވަމުންނެވެ.
ޕީޕީއެމްގެ ޓީމުން މިހާރު އައްޑު އށް ކުރާ ދަތުރުގައި ކުރިން އޮތީ މިއަދު ހުޅުމީދު އަށް ވެސް ވަޑައިގަންނަވާ ގޮތަށެވެ.
ނަމަވެސް މިރޭ ފޭދޫގައި ޖަލްސާ ބޭއްވުމަށް ފަހު، ޕީޕީއެމްގެ ޓީމް ފަތިހު އައްޑޫން ފުރާނެ އެވެ.
އަދި ވަރަށް އަވަހަށް ހުޅުމީދު އަށް ކުރާ ހާއްސަ ދަތުރެއްގައި ޕީޕީއެމްގެ ޓީމް އައްޑު އަށް އަންނާނެ ކަމަށް އެ ޕާޓީން ބުނެ އެވެ.