ހދ. ނޮޅިވަރަންފަރަށް ބަދަލުކުރި އެއަތޮޅުގެ އެހެން ރަށްތަކުގެ އާއިލާތަކުގެ ތެރެއިން، މިހާތަނަށް ދާއިމީ ބޯހިޔާވަހިކަން ސަރުކާރުން ފޯރުކޮށްދީފައިނުވާ 52 އާއިލާއަށް ކޮންމެ އާއިލާއަކަށް އެއް ލައްކައަށް ވުރެ ގިނަ ރުފިޔާގެ މަގުން ފައިސާ ހަވާލުކުރަން ފަށައިފިއެވެ.
އެގޮތުން ކޮންމެ އާއިލާއަކަށް ދޭން ނިންމާފައިވަނީ ބޯހިޔާވަހިކަން ފޯރުކޮށްނުދީ ހޭދަކުރި މުއްދަތަށް، ކޮންމެ މަހަކަށް 3،000ރ. ގެ މަގުން ޖުމުލަ 156،000ރ. އެވެ. ނަމަވެސް ސަރުކާރުގެ ބަޖެޓު ތާށިވެ އެކީ އެކަށް ފައިސާ ހަވާލުނުކުރެވޭތީ ފައިސާ ހަވާލުކުރަން ނިންމާފައިވަނީ ބައިބަޔަށެވެ.
އެގޮތުން ފުރަތަމަ ކޮންމެ އާއިލާއަކަށް ވެސް ދިނުމަށް ހަމަޖެހިފައިވަނީ 117،000ރ. އެވެ. ކައުންސިލުން ވަނީ ބަދަލުގެ ފައިސާ ލިބެން ޖެހޭ އާއިލާތަކުން މިއަދުން ފެށިގެން ކައުންސިލްގެ ރަސްމީ ގަޑީގައި ދެ ހެކިވެރިންނާއެކު ހާޒިރުވުމުން ފައިސާ ހަވާލުކުރެވޭނެ ކަމަށެވެ.
ސަރުކާރުގެ އެއްފަސްކުރުމުގެ ސިޔާސަތުގެ ދަށުން ނޮޅިވަރަންފަރަށް ބަދަލުކޮށްފައި ވަނީ، ފަރިދޫ، ކުނބުރުދޫ އަދި މާވައިދޫގެ އާއިލާތަކެވެ.