ފުވައްމުލަކު ސިޓީގައި ސަރުކާރުން އެޅި ފްލެޓުތަކުގެ ޑައުންޕޭމެންޓާއި މަހު ކުލި ކުޑަ ކުރުމަށް ފްލެޓު ލިބުނު ހުރިހާ އެންމެން ސޮއިކޮށް ސިޓީ ކައުންސިލަށް ޕެޓިޝަނެއް ހުށައަޅައިފިއެވެ.
މިޕެޓިޝަން ސިޓީ ކައުންސިލަށް ހުށައަޅާފައިވާއިރު ރައީސް އޮފީހަށާއި ރައްޔިތުންގެ މަޖިލީހުގެ ރައީސަށް ވެސް ހުށައެޅުމަށް ވަނީ ނިންމާފައެވެ. އަދި ނައިބު ރައީސް ފައިސަލް ނަސީމް އެސިޓީއަށް ކުރައްވާ ދަތުރުފުޅުގައި އެމަނިކުފާނަށް ވެސް އެރުވުމަށް ވަނީ ނިންމާފައެވެ.
ފްލެޓަށް ދައްކަން ޖެހޭ ޑައުން ޕޭމެންޓުގެ ގޮތުގައި 19،000 ރުފިޔާއާއި މަހު ކުލީގެ ގޮތުގައި 3،800 ރުފިޔާގެ އިތުރުން މެއިންޓެނެންސް ފީގެ ގޮތުގައި 800 ރުފިޔާ ދައްކަން ޖެހޭ ކަމަށް ބުނެ ގިނަ އަދަދެއްގެ ރައްޔިތުން ވަނީ ހޯމަ ދުވަހު ކައުންސިލް އަށް ޝަކުވާ ހުށައަޅާފައެވެ.
ފުވައްމުލަކުން މައުލޫމާތު ދިން ފަރާތަކުން ބުނެފައިވަނީ އެސިޓީގައި ސިވިލް ސާވަންޓުންގެ މުސާރައަކީ ގާތްގަނޑަކަށް 6،000 ރުފިޔާ އާއި 8،000 ރުފިޔާއާ ދެމެދު އަދަދެއް ކަމަށެވެ. ފްލެޓަށް މުސާރައިގެ ދެބައިކުޅަ އެއްބައި ދައްކަން ޖެހޭނަމަ ޚަރަދު ފޫނުބެދޭނެ ކަމަށް ބުނެ އެފަރާތުން ކަންބޮޑުވުން ފާޅުކޮށްފައިވެއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުން ބޯހިޔާވަހިކަމަށް އެޅި ފްލެޓުތަކުގެ އަގާމެދު ރައީސް ސޯލިހް ވެސް ވަނީ ކަންބޮޑުވުން ފާޅުކުރައްވާފައެވެ. އެމަނިކުފާނު ވިދާޅުވީ، ފްލެޓުތައް އަޅާފައިވަނީ ދެކޮޅު ނުޖެހޭ ގޮތަކަށް ކަމަށެވެ. ނަމަވެސް އޭރުގެ ހައުސިން މިނިސްޓަރ މުހައްމަދު މުއިއްޒު ވަނީ ރައީސް ޔާމީން ފްލެޓު އެޅީ އެހާ ބޮޑު އަގުގައި ފްލެޓު ދިނުމަށް ނުން ކަމަށް ބުނެފައެވެ.