ކުރީގެ ރައީސް އަބްދުﷲ ޔާމީންގެ ބޯހިޔާވަހިކަމުގެ ސިޔާސަތުގެ ދަށުން އަތޮޅުތަކުގައި އެޅި ފްލެޓުތަކަކީ ބޮޑު އަގުގައި ދޭން އެޅި ފްލެޓުތަކެއް ނޫން ކަމަށް އެމަނިކުފާނުގެ ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ފުވައްމުލަކުގައި އެޅި ފްލެޓުތައް ޝޯޓްލިސްޓުވެ ފްލެޓް ލިބުނު ފަރާތްތަކުން، ފްލެޓަށް ދައްކަން ޖެހޭ އަގުތަކާއި މެދު ކަންބޮޑުވުން ފާޅުކުރަމުންދާ ދަނޑިވަޅެއްގައި ޑރ. މުއިއްޒު ކުރެއްވި ޓުވިޓެއްގައި ވިދާޅުވީ ޔާމީން ސަރުކާރުން ފްލެޓު ދިނުމަށް ހަމަޖެއްސީ ޑައުންޕޭމެންޓު ތިން މަހަށް ބަހާލައިގެން ދެއްކުމަށް ކަމަށެވެ. އެގޮތުން ފުރަތަމަ މަހު 7،000ރ. ދެއްކުމަށް ފަހު ޖެހިގެން އަންނަ ދެމަހު ކޮންމެ މަހެއްގައި 6،000ރ. ދައްކަން ޖެހޭ ގޮތަށް ކަމަށް އޭނާ ވިދާޅުވިއެވެ.
އަދި ފްލެޓުގެ މަހު ކުލީގެ އަގު ކަނޑައެޅީ 2،500ރ. އަށް ކަމަށް ވެސް މުއިއްޒު ވިދާޅުވެފައިވެއެވެ. އައްޑޫ އާއި ފުވައްމުލަކުގައި އެޅި ފްލެޓުތައް ނިންމައި ލިބުނު ފަރާތްތަކާ ހަވާލުކުރާނެ ދުވަސް އެކި ފަހަރު މަތިން މުއިއްޒު އިއުލާން ކުރެއްވި ނަމަވެސް ޔާމީންގެ ވެރިކަން ނިމިދިޔައީ އެއްވެސް ފަރާތަކަށް ފްލެޓު ނުލިބިއެވެ.
އެމަނިކުފާނުގެ ސަރުކާރުގައި ފްލެޓު ދިން ގޮތަށް ގިނަ ބަޔެއްގެ ފާޑުކިޔުންތައް އަމާޒުވެފައިވާއިރު ފްލެޓު ހައްގު ނޫން އެތައް ބަޔަކަށް ސިޔާސީ މަންފާ ހޯދުމަށް ދިން ކަމުގެ ތުހުމަތުވެސް މިނިސްޓަރު ކަމުގައި މުއިއްޒު ހުންނެވި އިރު ކުރެވުނެވެ. ނަމަވެސް އޭނާ ވަނީ އެތުހުމަތުތައް ދޮގުކޮށްފައެވެ.