މިއަހަރު ހުޅުވާ 20 ވަނަ ރިސޯޓަކީ މީދޫ އާއި ޖެހިގެން އޮތް އިސްމެހެލާ ހެރަ ގައި ހަދާ ސައުތު ޕާމް މޯލްޑިވްސް ރިސޯޓުކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ކްރޮސްރޯޑު މޯލްޑިވްސްގައި އިއްޔެ ބޭއްވި "މޯލްޑިވްސް ޓޫރިޒަމް ކޮންފަރެންސް 2019" ގައި ވާހަކަފުޅު ދައްކަވަމުން އަލީ ވަހީދު ވިދާޅުވީ މިއަހަރު މިހާތަނަށް 19 ރިސޯޓެއް ހުޅުވާފައިވާ ކަމަށާއި މިއަހަރު ހުޅުވާ 20 ވަނަ ރިސޯޓު ހުޅުވާނީ އައްޑޫގައި ކަމަށެވެ.
"އަޅުގަނޑުމެން ވައުދުވީ ފުރަތަމަ އަހަރު 20 ރިސޯޓް ހުޅުވަން. މީގެ ދެ ރޭ ކުރިން 19 ވަނަ ރިސޯޓް ހުޅުވިއްޖެ. ވިހި ވަނަ ރިސޯޓް އިރާދަކުރެއްވިޔާ އައްޑޫގައި ހުޅުވިގެންދާނެ،" އަލީ ވަހީދު ވިދާޅުވި އެވެ.
އިސްމެހެލާ ހެރައިގެ ފުރަތަމަ ފިޔަވަހީގެ ދަށުން ހަތަރު ތަރީގެ 130 ވިލާ ވަނީ ހަދާފައެވެ. އަދި ތަނަށް ބޭނުންވާ މުވައްޒަފުން ނަގައި ތަމްރީނުކޮށް ތަން ހުޅުވަން އަންނަނީ ތައްޔާރުވަމުންނެވެ.
2017 ވަނަ އަހަރު ހަދަން ފެށި މި ރިސޯޓުގެ ދެވަނަ ފިޔަވަހީގައި 110 ވިލާ ހެދުމަށްވަނީ ހަމަޖެހިފައެވެ.
އައްޑޫގައި މިވަގުތު ހިންގަނީ ޝަންގްރިއްލާ ވިލިނގިލި ރިސޯޓާއި ކެނަރީފް ރިސޯޓުގެ އިތުރުން ގަމުގައި އީކުއޭޓަރ ވިލެޖުގެ ނަމުގައި ހިންގަމުން އަންނަ ސިޓީ ހޮޓަލެވެ.
މި ސަރުކާރުން ވަނީ އައްޑޫގައި 8000 އެނދު ހަނދާނެކަމަށް ވައުދުވެފައެވެ. އޭގެ ތެރެއިން 4000 އެނދު ހެދުމަށް ގެސްޓު ހައުސްތަކަށް ބިން ދޫކުރުމަަށް މިމަހު ތެރޭގައި ފަށާނެކަމަށް އައްޑޫ ސިޓީ ކައުންސިލާއި ޓޫރިޒަމް މިނިސްޓްރީން ވަނީ ބުނެފައެވެ.