ޚިޔާލު ފާޅުކުރުމުގެ މިނިވަންކަމުގެ ދަށުގައި ތިބެ އިސްލާމް ދީނަށާއި، ރަސޫލާއަށް އެއްވެސް މީހަކު ފުރައްސާރަކުރުމަކީ ބަލައިގަނެވޭނެ ކަމެއް ނޫން ކަމަށް ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެއެވެ.
މޯލްޑިވިއަން ޑިމޮކްރަސީ ނެޓްވޯކް(އެމްޑީއެން) އިން ނެރުނު ރިޕޯޓެއްގައި ގުރުއާނަށާއި ރަސޫލާއަށް އަމާޒުކޮށް ބަދުބަސް ރައްދުވުމާއެކު ގިނަ ބަޔެއްގެ ފާޑުކިޔުންތައް އަމާޒުވެފައިވާއިރު އެ ނެޓްވޯކް ހުއްޓުވުމަށް ގޮވާލައި ސޯޝަލް މީޑިޔާގައި ކެމްޕޭނެއް ވެސް ވަނީ ފަށާފައެވެ.
މިމައްސަލައާ ގުޅިގެން އަލީ ހުސެއިން މިއަދު ކުރެއްވި ޓުވީޓެއްގައި ވިދާޅުވީ، ޚިޔާލުފާޅު ކުރުމުގެ ނަމުގައި ވިޔަސް ނުވަތަ އިލްމީ ދިރާސާ ކުރުމުގެ ނަމުގައި ވިޔަސް އިސްލާމް ދީނާއި، ރަސޫލާއަށް ބަދުބަހެއް ނުވަތަ މަލާމާތެއް ރައްދު ކުރުމަކީ ބަލައިގަނެވޭނެ ކަމެއް ނޫން ކަމަށެވެ.
ރާއްޖޭގެ ގާނޫނު އަސާސީގައި ޚިޔާލު ފާޅުކުރުމުގެ މިނިވަންކަން ދީފައި އޮތީ އިސްލާމް ދީނުގެ އަސާސަކާއި ޚިލާފު ނުވާ ގޮތަށް އެހެން މީހެއްގެ އަބުރަށް ނާރާ ޚިޔާލު ފާޅުކުރުމަށެވެ. އެހެންކަމުން މޯލްޑިވިއަން ޑިމޮކްރަސީ ނެޓްވޯކުން ނެރުނު މިރިޕޯޓަކީ ގާނޫނާއި ޚިލާފުވެސް އަމަލެއް ކަމަށް ގިނަ ބަޔަކު ބުނެފައިވެއެވެ.
އެމްޑީއެންގެ ރިޕޯޓަށް ފާޑުކިޔުންތައް އަމާޒުވާން ފެށުމުން އެރިޕޯޓު އަނބުރާ ނަގާ، އެފަރާތުން ވަނީ މައާފަށް ވެސް އެދިފައެވެ. އެމައްސަލަ ބަލާދިނުމަށް އިސްލާމިކް މިނިސްޓްރީން ވެސް ވަނީ ފުލުސް އޮފީހަށް ހުށައަޅައި އެދިފައެވެ.