ސްޕްރީމް ކޯޓްގެ ފަނޑިޔާރެއްގެ އޮރިޔާން ވީޑިއޯ ބޭނުންކޮށްގެން ބްލެކްމެއިލް ކުރުމާއި އޭގެ ވިޔަފާރި ކުރަން އުޅުނު ކަމުގެ ތުހުމަތުގައި ފުލުހުން ހައްޔަރު ކުރި ސ. ފޭދޫ ޕިންކް ހައުސް އަހުމަދު ފާއިޒް ގައުމީ އިއްތިހާދު ޕާޓީގެ ކައުންސިލްގެ މެމްބަރުކަމުން ވަކިކޮށްފި އެވެ.
ރައީސް ޑރ. މުހަންމަދު ވަހީދުގެ ޕާޓީގެ ކައުންސިލް މެމްބަރުކަމުން ފާއިޒް ވަކި ކުރީ އިއްޔެ ބޭއްވި ކައުންސިލް ބައްދަލުވުމުގައި ކަމަށް އެ ޕާޓީގެ އޮފިޝަލަކު ވިދާޅުވި އެވެ.
އޭނާ ވިދާޅުވި ގޮތުގައި ފާއިޒްގެ ޝަރީއަތް ނިމޭ ގޮތަކުން ޕާޓީން ވެސް ވަކި ކުރުމާ މެދު ގޮތެއް ނިންމާނެ އެވެ.
ކުރިން މޯލްޑިވްސް ބްރޯކާސްޓިން ކޯޕަރޭޝަން (އެމްބީސީ) ގެ މެނެޖިން ޑިރެކްޓަރު ފާއިޒް ހައްޔަރު ކުރި އިރު އޭނާ ހުންނެވީ ހައުސިން މިނިސްޓްރީގެ އެޑްވައިޒަރުގެ މަގާމުގަ އެވެ.
މިދިޔަ މަހުގެ 26 ވަނަ ދުވަހު ފާއިޒް ހައްޔަރު ކުރުމަށް ފަހު އޭނާގެ ބަންދުގެ މުއްދަތަށް ވަނީ 15 ދުވަސް އިތުރުކޮށްފަ އެވެ.