ރާއްޖޭގައި އޮތް އިލެކްޝަންސް ކޮމިޝަނުގައި ތިބީ މިހާރު އަމާނާތްތެރިންނެއް ނޫން ކަމަށް ވިދާޅުވެ، ކުރިއަށް އޮތް ލޯކަލް ކައުންސިލް އިންތިޚާބުގައި ރައްޔިތުން ފާރަވެރިވެ ތިބުމަށް ކުރީގެ ރައީސް އަދި އިދިކޮޅު ލީޑަރ އަބްދުﷲ ޔާމީން އަބްދުލްޤައްޔޫމް ގޮވާލައިފިއެވެ.
މަނީ ލޯންޑަރިންގެ ދައުވާ އުފުލާފައިވާ ޔާމީންގެ ޝަރީއަތް ނިމުމަކާ ގާތްވެފައިވާއިރު އެމަނިކުފާނު މިހާރު ކުރައްވަމުން ގެންދަވަނީ ލޯކަލް ކައުންސިލް އިންތިޚާބުގެ ކެމްޕޭނު ދަތުރުތަކެވެ. މިހާރު މާލެ އަތޮޅުގެ ރަށްތަކަށް ވަޑައިގެންފައިވާއިރު މިއަދު ކ. ހުރާއަށް ވަޑައިގެން އެރަށު ރައްޔިތުންނާ ބައްދަލުކޮށް އިންތިޚާބަށް ފާރަވެރިވުމަށް އެދިވަޑައިގެންނެވިއެވެ.
މިދިޔަ އަހަރު ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިޚާބުން ބަލިވެ ރައީސްކަމުން ފައިބާވަޑައިގަންނަން ޖެހުނަސް އަދިވެސް ރައީސް ޔާމީން ބަލި ގަބޫލު ނުކުރައްވައެވެ. އެމަނިކުފާނު ތުހުމަތު ކުރައްވާ ގޮތުގައި މިހާރުގެ ސަރުކާރާ ބައިއަތު ހިފައިގެން އިލެކްޝަންސް ކޮމިޝަނުން ވޯޓުން "ވައްކަން" ކުރީއެވެ.
މިއަދު ހުރާ ރައްޔިތުންނާ ބައްދަލުކޮށް ޔާމީން ވިދާޅުވީ، މިފަހަރު އެންމެ ވޯޓެއްވެސް ވަގަށް ނެގުނަ ދީގެން ނުވާނެ ކަމަށެވެ. ރައްޔިތުންނަށް ރަނގަޅު ކަމެއް ހާސިލްވާނީ ޕީޕީއެމް ކޯލިޝަނަށް ކައުންސިލް އިންތިޚާބުގައި ގޮނޑި ދީގެން ކަމަށް ޔާމީން ވިދާޅުވިއެވެ.