މޯލްޑިވްސް ޑިމޮކްރެސީ ނެޓްވޯކް(އެމްޑީއެން) އިން ނެރެފައިވާ ރިޕޯޓެއްގައި ރަސޫލާއަށް އަމާޒުކޮށް ބަދުބަސް ބުނެފައިވާކަން ހާމަވެ ގިނަ ބަޔެއްގެ ފާޑުކިޔުންތައް އަމާޒުވެފައިވާއިރު ސަރުކާރު ހިންގާ މައި ޕާޓީ، އެމްޑީޕީ އިން އެކަމާ ގުޅޭގޮތުން ބަހެއް ބުނެފައިނުވާތީ ބައެއް ފަރާތްތަކުން ފާޑުކިޔާން ފަށައިފިއެވެ.
އެރިޕޯޓާ ގުޅިގެން މިހާތަނަށް، ކޯލިޝަންގައި ހިމެނޭ ޖުމުހޫރީ ޕާޓީ އާއި އަދާލަތު ޕާޓީގެ އިތުރުން އެމްއާރްއެމްގެ އިން ވަނީ ކުށްވެރިކޮށް، ދީނަށް ފުރައްސާރަ ކުރުން ބަލައިނުގަނެވޭނެ ކަން ހާމަކޮށްފައެވެ. އެމްއާރްއެމްގެ ބާނީ ރައީސް މައުމޫން ޓުވީޓެއް ކުރައްވާފައިވާއިރު އަދާލަތާއި ޖޭޕީއިން ވަނީ ބަޔާން ނެރެ ކުށްވެރިކޮށްފައެވެ.
އަދާލަތު ޕާޓީން ރޭ ނެރުނު ރިޕޯޓުގައި ބުނެފައިވަނީ އެމްޑީއެންގެ ރިޕޯޓަކީ ގާނޫނު އަސާސީއާ ޚިލާފު އަދި ރައްޔިތުންގެ މެދުގައި ނުތަނަވަސްކަން އުފައްދައި ނަފްރަތަށް ހުޅުވާލެވުނު ރިޕޯޓަކަށް ވާތީ އެކަން ކުރި ބަޔަކާ ދެކޮޅަށް ދައުވާ ކުރަން ޖެހޭ ކަމަށެވެ.
އަދި އެރިޕޯޓުގައި އިންޓެލިޖެންސް މައުލޫމާތުވެސް ހިމެނޭތީ، އެމައުލޫމާތު ދިން ފަރާތްތަކުން ހޯދައި ފިޔަވަޅު އެޅުމަށް ތަހުގީގު ކުރުމަށް ވެސް ގޮވާލާފައިވެއެވެ.
މައްސަލަ ހޫނުވެ ފާޑުކިޔުން އަމާޒުވުމުން އެމްޑީއެން އިން ވަނީ އެ ރިޕޯޓު ނަގައި، މައާފަށް އެދި އިސްލާހު ކުރުމުގެ މަސައްކަތް ފަށާފައެވެ.
ނަމަވެސް އެމްޑީއެންގައި އިސްކޮށް ހަރަކާތްތެރިވާ ޝަހިންދާ އިސްމާއިލް ވަނީ، ޓުވިޓާގައި ފިތުނަ އުފައްދަނީ ރިޕޯޓެއް ނޫން ކަމަށާއި އެކަން ކުރަނީ ޓެރަރިޒަމްގެ ގާނޫނަށް ބަދަލު ގެނައުމުން އެކަމާ ތެޅިގެން އުޅޭ ބަޔެއް ކަމަށް ބުނެ ރައްދު ދީފައެވެ.
މިނިސްޓްރީ އޮފް އިސްލާމިކް އެފެއާޒް އިން ވަނީ އެ ރިޕޯޓު ނެރުނު ފަރާތްތައް ތަހުގީގު ކުރުމަށް ފުލުސް އޮފީހަށް މައްސަލައެއް ހުށައަޅާފައެވެ. އެކަން އިއުލާންކޮށް މިނިސްޓްރީން ކުރި ޓުވީޓު ފަހުން ވަނީ ޑިލީޓުކޮށްލާފައެވެ.
ރިޕޯޓާ ގުޅިގެން ދީނަށް ފުރައްސާރަކުރުން ބަލައިނުގަނެވޭނެ ކަމަށް ބުނެ ބައެއް މިނިސްޓަރުން ޓުވީޓު ކޮށްފައިވާއިރު ސަރުކާރުން ރަސްމީކޮށް އެކަމާ ގުޅިގެން އެއްޗެއް ބުނެފައެއް ނުވެއެވެ. ބައެއް މީހުން ވަނީ އެރިޕޯޓަކީ 2015 ވަނަ އަހަރު ނެރުނު ރިޕޯޓަކަށް ވާތީ މިސަރުކާރުން ރިޕޯޓަށް ޖަވާބުދާރީ ވާން ނުޖެހޭ ކަމަށް ވެސް ބުނެފައެވެ.