މިހާރު އައްޑޫގައި ކުރިއަށްދާ ސައުތް އޭޝިއަން އަންޑަ 21 ބެޑްމިންޓަން މުބާރާތުގައި ރޭ ކުޅުނު މެޗުތައް އިންޑިޔާއާއި ލަންކާ ފަސޭހަކަމާއެކު ކާމިޔާބުކޮށްފިއެވެ. އިންޑިޔާ ޕާކިސްތާނާ ވާދަކޮށްފައިވާއިރު ލަންކާ ބައްދަލުކުރީ ނޭޕާލާއެވެ. އަދި ރާއްޖެ ކުޅުނީ ބަންގްލަދޭޝާ ދެކޮޅަށެވެ.
އިންޑިޔާއާއި ލަންކާ ވެސް ވަނީ ކުޅުނު ހުރިހާ މެޗެއް ކާމިޔާބުކޮށްފައެވެ. ބަންގަލަދޭޝުން ވަނީ 3 މެޗު ކާމިޔާބުކޮށްފައިވެއެވެ. ދެމެޗުން މޮޅުވީ ރާއްޖެއެވެ.
ރާއްޖެއަށް ރޭގެ މެޗުގައި ކާމިޔާބު ކުރެވިފައިވަނީ އެންމެ މެޗެކެވެ. އެއީ ވިމެންސް ސިންގަލްއެވެ. އެ މެޗު ރާއްޖޭގެ ޒުވާން ކުޅުންތެރިޔާ، ފާތުމަތު ނަބާހާ އަބްދުއްރައްޒާގް ވަނީ ފަސޭހަކަމާއެކު 14-21 އަދި 10-21 އިން ކާމިޔާބުކޮށްފައެވެ.
ވިމެންސް ޑަބަލް މެޗު ރާއްޖެއަށް ލިބުނީ ބަންގަލަދޭޝް ޓީމުން ބައިވެރިނުވާތީއެވެ. މެންސް ސިންގަލް، މެންސް ޑަބަލް އަދި މިކްސްޑް ޑަބަލް ބަންގަލަދޭޝުން ވަނީ ކާމިޔާބުކޮށްފައެވެ.
މިމުބާރާތުގައި މިއަދުގެ މެންދުރުފަހު 14:00 ގައި ވެސް މެޗުތައް ކުޅޭނެއެވެ. މެންދުރު ފަހު ލަންކާއާ ދިވެހި ރާއްޖެ، ބަންގާޅާ ނޭޕާލް އަދި ބޫޓާނާ ޕާކިސްތާންގެ މެޗުތައް ކުޅޭނެއެވެ. މެޗުތައް ކުޅޭނީ ހިތަދޫ ޒުވާނުންގެ މަރުކަޒު ބިމުގައި އަލަށް އެޅި ބެންޑްމިންޓަން ކޯޓުގައެވެ.