ރާއްޖެ ސަރަހައްދުން ބޯޓެއް ފާސްކުރުމަށް ފަހު 150 ކިލޯގެ މަސްތުވާތަކެތި އަތުލައިގެންފައިވާ ކަމަށް އިންޑިޔާގެ މީޑިޔާތަކުން ރިޕޯޓުކޮށްފިއެވެ.
ޚަބަރު ލިބޭ ގޮތުގައި މިއޮޕަރޭޝަން ހިންގާފައިވަނީ އިންޑިޔާގެ އިންޓެލްއަށް ބިނާކޮށް ދިވެހި ސިފައިންނާއި ފުލުހުންނެވެ. މިކަމާ ގުޅޭގޮތުން އަދި ދިވެހި އިދާރާއެއްގެ ބަހެއް ލިބިފައެއް ނުވެއެވެ. ނަމަވެސް އަތުލައިގެންފައިވަނީ ޕާކިސްތާނުން ރާއްޖެއަށް ދަތުރުކުރި ބޯޓެއް ކަމަށް މައުލޫމާތު ލިބެއެވެ.
އަދި އޭގައި ހުރީ 150 ކިލޯގެ ހެރޮއިން ކަމަށް އިންޑިޔާގެ ނޫސްތަކުން ރިޕޯޓުކޮށްފައިވެއެވެ. މިއީ ފާއިތުވެދިޔަ ތިން މަސް ދުވަސް ތެރޭ ޕާކިސްތާނުން ފޮނުވި މަސްތުވާތަކެތި އަތުލައިގަތް ފަސް ވަނަ ފަހަރު ކަމަށް އިންޑިޔާގެ އޮފިޝަލުން ބުނެއެވެ. 140 ކިލޯގެ ހެރޮއިން ލަންކާއަށް އެތެރެކުރަން އުޅެނިކޮށް ވެސް ވަނީ ދާދި ފަހުން އަތުލައިގެންފައެވެ.
ޝައްކު ކުރެވޭ ބޯޓެއް ޕާކިސްތާނު މަގުން ރާއްޖެ ދަތުރުކުރުމުން އިންޑިޔާއިން ވަނީ ކޯސްޓު ގާޑަށް މައުލޫމާތު ދީފައި ކަމަށާއި، ކޯސްޓު ގާޑާއި ފުލުހުން ވެގެން ބޯޓު ރޭގެ ދަންވަރު ވަގުތެއްގައި އަތުލައިގެންފައިވާ ކަމަށް އިންޑިޔާގެ ބައެއް ނޫސްތަކުން އެގައުމުގެ އޮފިޝަލުންނާ ހަވާލާދީ ރިޕޯޓުކޮށްފައިވެއެވެ.
މިދިޔަ ޖުލައި މަހު އިރާނަށް ރަޖިސްޓާ ވެފައިވާ ބޯޓެއް ވެސް ވަނީ ލަންކާ މަގުން ރާއްޖެއަށް މަސްތުވާތަކެތި އެތެރެކުރުމަށް އުޅެނިކޮށް އަތުލައިގެންފައެވެ. ބޯޓުގައި ތިބި 7 މީހުންގެ ތެރެއިން 5 މީހުންނަށް ދައުވާ ކުރަން ޕީޖީ ވަނީ ނިންމާފައެވެ.