ކުރީގެ ރައީސް މުހައްމަދު ނަޝީދުގެ ވެރިކަން މީގެ 7 އަހަރު ކުރިން 2012، ފެބްރުއަރީ 7 ވަނަ ދުވަހު މަގުމަތިން ވައްޓާލީ ބަޣާވާތެއް ކޮށްގެން ކަމަށް ބުނެ އެ މައްސަލަ 19 ވަނަ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ބަލަން ފަށައިފިއެވެ.
މިމައްސަލަ މަޖިލީހުން ބަލަން ފެށީ ކޮމިޓީއަށް ލިބުނު ސިޓީއަކާ ގުޅިގެންނެވެ. ނަމަވެސް ސިޓީ ފޮނުވި ފަރާތެއްގެ ތަފްސީލެއް ކޮމިޓީން އަދި މަޖިލީހުގެ އިދާރާއިން ވެސް ދީފައެއް ނުވެއެވެ.
ގިނަ އަދަދެއްގެ ސިފައިންނާއި ފުލުހުން ރައީސް ނަޝީދާ ދެކޮޅަށް ނިކުތްއިރު އޭރު އެކަމުގައި އިސް ސަފުގައި ތިއްބެވި ގިނަ ބަޔަކު މިހާރު ސަރުކާރުގައި އެބަތިއްބެވެ. އެގޮތުން ސަރުކާރު ކޯލިޝަނުގައި، ޖުމުހޫރީ ޕާޓީގެ މެމްބަރުންގެ ގޮތުގައި ދަނގެތީ ދާއިރާގެ މެމްބަރު މުހައްމަދު ނާޒިމާއި، ތިމަރަފުށީ ދާއިރާގެ މެމްބަރު އަބްދުﷲ ރިޔާޒް ހިމެނެއެވެ.
އަދި ނާޒިމަކީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ މެމްބަރެއް ވެސް މެއެވެ. ނާޒިމާއި ރިޔާޒަށް އޭރު ރައީސް ނަޝީދާއި އެމްޑީޕީން ވަރަށް ބޮޑަށް ފާޑުކިޔާފައިވި ނަމަވެސް ކުރީގެ ރައީސް ޔާމީންގެ ވެރިކަން ނިމުމަކަށް ގެނައުމަށް ހުރިހާ ބޭފުޅުން ވަނީ އެއްގަލަކަށް އަރާ މަސައްކަތް ކޮށްފައެވެ.
ނަޝީދަށް ފަހު ވެރިކަމާއި ހަވާލުވެވަޑައިގެންނެވި އެމަނިކުފާނުގެ ނައިބު، ޑރ. މުހައްމަދު ވަހީދުގެ ވެރިކަމުގައި ވެރިކަން ވެއްޓުނު މައްސަލަ ބެލުމަށް ރިޔާސީ ކޮމިޝަނެއް އުފެއްދިއެވެ. ބޭރުގެ ފަރާތްތަކުން އިސްކޮށް ތިބި ކޮމިޝަނުން ނިންމީ، ވެރިކަން ނިމުނީ މަޖުބޫރީ ހާލަތެއް މެދުވެރިނުވެ، ރައީސް ނަޝީދުގެ އަމިއްލަފުޅު ނިންމުމަކަށް ކަމަށެވެ.