ރައީސް އިބްރާހިމް މުހައްމަދު ސޯލިހްގެ ވައުދެއް ކަމަށްވާ އިންކަމް ޓެކްސް ނެގުން ހަގީގަތަކަށް ހެދުމަށް ސަރުކާރުން އިއްޔެ މަޖިލީހަށް ފޮނުވި ބިލްތަކުގެ ތެރޭގައި އިންކަމް ޓެކްސްގެ ބިލް ހިމެނުމުން މާމިގިލި ދާއިރާގެ މެމްބަރު އަދި މަޝްހޫރު ވިޔަފާރިވެރިޔާ ގާސިމް އިބްރާހިމް، ކޮމިޓީ ދޫކުރައްވައި ނިކުމެވަޑައިގެންފިއެވެ.
ރައްޔިތުންގެ މަޖިލީހުގެ އިގްތިސޯދީ ކޮމިޓީގެ މެމްބަރަކަށް ވެސް ހުންނަވާ ގާސިމް ކޮމިޓީ ދޫކޮށް ވަޑައިގެންފައިވާ ކަން ހާމަކުރެއްވީ ކޮމިޓީގެ މުގައްރިރުގެ ނައިބު އަދި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ.
އިންތިއާ ހަވާލާދީ "ރާއްޖެ އެމްވީ" އިން ރިޕޯޓުކޮށްފައިވާ ގޮތުގައި ގާސިމް ނިކުމެވަޑައިގެންނެވީ އެބިލް ހުށައެޅުމުން އެކަމާ ހިތްހަމަނުޖެހިއެވެ. ގާސިމް ވަނީ މީގެ ކުރިން އެބިލްގެ މަސައްކަތް ކުރަން ޖެހޭނީ ކޮމިޓީން ކަމަށް ވިދާޅުވެފައެވެ.
ސަރުކާރުން ވަނީ މިދައުރުގައި 34 ބިލެއް މަޖިލީހަށް ހުށައެޅުމަށް ނިންމާފައެވެ. އޭގެ ތެރޭގައި ޓުއަރިޒަމްގެ ބިލު، ދެވަނައަށް ވަޒީފާ ހޯދާ ފަރާތްތަކަށް ދޭ އެލަވަންސްގެ ބިލު، ތިންވަނަ އަށް އެންމެ ކުޑަ އުޖޫރައިގެ ބިލު، ހަތަރުވަނައަށް ފޮރެސްޓްރީ އަދި ފަސްވަނައަށް އިންކަމް ޓެކްސްގެ ބިލު ވަނީ ހިމަނާފައެވެ.