ސަރުކާރުގެ ލޯނުތަކާއި ދަރަނި ދެއްކުން ލުއިކުރުމަށް އުފައްދާފައިވާ ސޮވެރިން ޑިވެލޮޕްމެންޓް ފަންޑުގައި ހުރި ފައިސާ މިސަރުކާރު އައިފަހުން ދެގުނަ އިތުރުވެފައިވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ މިއަދު ރައްޔިތުން މަޖިލީހަށް ހާޒިރުކޮށް، މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރ މުހައްމަދު ސައީދު ކުރެއްވި ސުވާލަކަށް ޖަވާބު ދެއްވަމުންނެވެ.
ސައީދު ވަނީ ޔާމީންގެ ވެރިކަން ނިމުނުއިރު ސޮވެރިން ފަންޑުގައި ހުރި 100 މިލިއަން ޑޮލަރަށް މިހާރު ވެފައިވަނީ ކީއްތޯ ސުވާލުކުރައްވާފައެވެ.
ޖަވާބުގައި މިނިސްޓަރު ވިދާޅުވީ ޔާމީންގެ ވެރިކަން ނިމުނުއިރު އެފަންޑުގައި ހުރީ 96.3 މިލިއަން ޑޮލަރު ކަމަށާއި، މިދިޔަ ބުރާސްފަތި ދުވަހާ ހަމައަށް ފަންޑުގައި 181 މިލިއަން ޑޮލަރު ހުރި ކަމަށެވެ. އެހެންކަމުން މިސަރުކާރު އައި ފަހުން އެ ފަންޑުގައި ހުރި ފައިސާ ގާތްގަނޑަކަށް ދެގުނަ ވެފައިވާ ކަން މިނިސްޓަރ ފާހަގަކުރެއްވިއެވެ.
ރައީސް ޔާމީންގެ ސަރުކާރުގައި ލޯނު ނަގައިގެން ތަރައްގީކުރި ވެލާނާ އެއާޕޯޓުގެ އާ ރަންވޭ އާއި ސިނަމާލެ ބްރިޖް ފަދަ ބޮޑެތި މަޝްރޫއުތަކަށް ދައްކަން ޖެހޭ ފައިސާ ދެއްކުމަށް ނިންމާފައިވަނީ ސޮވެރިން ފަންޑުންނެވެ.