ސަރުކާރުގެ ބޯހިޔާވަހިކަމުގެ ސިޔާސަތުގެ ތެރެއިން ހިތަދޫގައި އިމާރާތްކޮށްފައިވާ ފްލެޓް ލިބޭ މީހުންގެ މެދުގައި ފްލެޓް ނަންބަރު ކަނޑައެޅުމަށް ގުރުއަތު ނެގުން މިރޭ ބާއްވަން ނިންމައިފިއެވެ.
އައްޑޫ ސިޓީ ކައުންސިލުން ބުނީ ހިތަދޫން ފްލެޓު ލިބޭ މީހުންގެ މެދުގައި ފްލެޓްތަކުގެ ގުރުނެގުން އޮންނާނީ މިރޭ 8:30 ގައި ނޫރާނީ ސުކޫލްގައި ކަމަށެވެ. އަދި ހުޅުދޫ ފްލެޓު ލިބޭ މީހުންގެ މެެދުގައި ފްލެޓު ނަންބަރު ގުރުނެގުން ބާއްވަން ނިންމާފައިވަނީ މާދަމާ ހެނދުނު ހުޅުދޫ ސްކޫލްގައިއެވެ.
އައްޑޫ ސިޓީ ކައުންސިލުން ވަނީ ހިތަދޫ އަދި ހުޅުދޫ ފްލެޓު ލިބޭ މީހުންގެ ދާއިމީ ލިސްޓު އާއްމުކޮށްފައެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހިތަދޫގައި 264 ފްލެޓު އަޅާފައިވާ އިރު ހުޅުދޫގައި ވަނީ 48 ފްލެޓު އަޅާފައެވެ. މި ފްލެޓު ތަކުގެ ތެރެއިން ހިތަދޫގައި އިމާރާތްކުރި 264 ފެލެޓުގެ ތެރެއިން ބައެއް ފްލެޓުވަނީ މަރަދޫ އަދި ފޭދޫ މީހުންނަށް ހާއްސަކޮށްފައެވެ.
ކައުންސިލުން ބުނީ ފްލެޓްތަކަށް ޑައުންޕޭމަންޓްގެ ގޮތުގައި 25،000 ރުފިޔާ ދައްކަން ޖެހޭ އިރު މަހު ފީގެ ގޮތުގައި 3،000 ރުފިޔާ ދައްކަންޖެހޭނެ ކަމަށެވެ.
ފްލެޓު ދޫކުރަން ތައްޔާރުވަމުން އަންނައިރު ފްލެޓަށް ނަރުދަމާ އަދި ކަރަންޓު ގުޅުމުގެ މަސައްކަތް ފެނަކަ ކޯޕަރޭޝަނުން އަންނަނީ ކުރަމުންނެވެ.