ރައްޔިތުންގެ މަޖިލީހަށް ފޮނުވާ ބިލުތައް ޑްރާފްޓް ކުރުން ސަރުކާރުން ކުރަމުން އަންނައިރު މަޖިލީހުން އެ ކަން ކުރަން ފެށުމާ ގުޅިގެން ބަންޑާރަ ނައިބު ރިފްއަތު ހިތްހަމަނުޖެހުން ފާޅުކޮށްފިއެވެ.
އޭޖީ ކުރެއްވި ޓުވީޓެއްގައި ވިދާޅުވީ، ސަރުކާރުން ވި ވައުދުތައް ފުއްދުމަށް ސަރުކާރުގެ ސިޔާސަތުތައް ތަންފީޒު ކުރާ މައިގަނޑު ވަސީލަތަކީ ސަރުކާރުން ރައްޔިތުންގެ މަޖިލީހަށް ހުށައަޅާ ބިލުތައް ކަމަށެވެ. އަދި ނަޒާހަތްތެރި މަޖިލީހަކުން އެކަން ކުރުމުގެ ފުރުސަތު ސަރުކާރަށް ދޭންވާނެ ކަމަށް ވިދާޅުވިއެވެ.
ސަރުކާރުން ހުށައަޅާ ބިލްތަކަކީ އެޓާނީ ޖެނެރަލް ޑްރާފްޓް ކުރުމަށް ފަހު ފޮނުވާ ބިލުތަކެވެ. ނަމަވެސް އެ "ޕްރޮސެސް" ތަންކޮޅެއް ލަސް ކަމަށް ބުނެ މަޖިލީހުގެ ކޮމިޓީތަކުން ވަނީ ބިލު ޑްރާފްޓް ކުރަން ފަށާފައެވެ.
މީގެ ކުރިން މަޖިލީހުގެ ރައީސް މުހައްމަދު ނަޝީދުވެސް ވަނީ ސަރުކާރުގެ ބައެއް ކަންކަމުގައި ލަސްކަމެއް، ފަރުވާކުޑަ ކަމެއް ފާހަގަކުރެވިފައިވާ ކަމަށް ވިދާޅުވެފައެވެ. ނަމަވެސް އެއީ ސަރުކާރު ހިންގުމުގައެއް ނޫން ކަމަށް ވިދާޅުވިއެވެ.
ރައީސް ނަޝީދު ވިދާޅުވީ މަޖިލީހުން އެމްޑީޕީންނާއި ސަރުކާރުން ހުށައަޅާނީ އެއް ބިލުތަކެއް ކަމަށެވެ. ސަރުކާރުން ހުށައަޅާ 34 ބިލެއްގެ އިތުރުން އެމްޑީޕީން ވެސް 20 ބިލެއް ހުށައަޅާނެ ކަމަށް ނަޝީދު އިއްޔެ ވިދާޅުވިއެވެ.
މިކަމާ ގުޅިގެން ޔޫތު މިނިސްޓަރ އަހުމަދު މަހްލޫފްވެސް ވަނީ ހިތްހަމަނުޖެހުން ފާޅުކޮށްފައެވެ. މަހްލޫފް ވިދާޅުވީ ސަރުކާރުން ހުށައަޅާ ބިލުތައް ހުށައަޅާނީ ސަރުކާރުން، އޭޖީ އޮފީހުން ކަމަށެވެ.