ރައްޔިތުންގެ މަޖިލީހުން އަމަލު ކުރަމުން އަންނަނީ ގާނޫނާއި ގަވާއިދުތަކުގައި ކަނޑައެޅިފައިވާ އިމުގެ ތެރެއިން ކަމަށް ވިދާޅުވެ ބަންޑާރަ ނައިބުގެ އޮފީހުން ކުރަމުން އަންނަ ބިލްތައް ޑްރާފްޓް ކުރުން، މަޖިލީހުން ފެށި ނިންމުން، މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ދިފާއު ކުރައްވައިފިއެވެ.
މަޖިލީހަށް ހުށައަޅާ ބިލްތައް ޑްރާފްޓު ކުރުމަށް ފަހު ފޮނުވަނީ ބަންޑާރަ ނައިބެވެ. ނަމަވެސް ސަރުކާރު ތެރޭގައި ލަސްކަމެއް އުޅޭކަން މަޖިލީހުން ފާހަގަކުރުމަށް ފަހު ދެވަނަ ދައުރުގައި ވަނީ ކޮމިޓީގައި ބިލްތައް ޑްރާފްޓް ކުރަން ފަށާފައެވެ.
އެކަމާ ގުޅިގެން ބަންޑާރަ ނައިބު އިބްރާހިމް ރިފްޢަތު ވަނީ ކަންބޮޑުވުން ފާޅުކުރައްވާފައެވެ. އެމަނިކުފާނު ވިދާޅުވީ ނަޒާހަތްތެރި މަޖިލީހަކުން ސަރުކާރަށް، ވައުދުތައް ފުއްދަން ފުރުސަތު ދެއްވާނެ ކަމަށެވެ. ބަންޑާރަ ނައިބުގެ އިތުރުން ޔޫތް އެންޑް ސްޕޯޓްސް މިނިސްޓަރ މަހްލޫފް ވެސް ވަނީ އެއް މޭރުމަކުން ވާހަކަ ދައްކަވާފައެވެ.
މިއަދުގެ ޖަލްސާގައި އެބޭފުޅުންގެ ވާހަކަތަކަށް ރިއާޔަތްކޮށް ރައީސް ނަޝީދު ވިދާޅުވީ، މަޖިލީހުގެ ގަވާއިދުގައި ސިޔާސި ޕާޓީތަކަށް ވެސް ބިލް ހުށައެޅުމުގެ ފުރުސަތު ދީފައި އޮންނަ ކަމަށެވެ. ބޭނުމަކީ ރައީސަކަށް ނުވަތަ އެމަނިކުފާނުގެ ޕާޓީއަކަށް މަޖިލީހުގައި އަޣުލަބިއްޔަތު ނުލިބިއްޖެ ހާލަތެއްގައި ވެސް ގާނޫނު ހެދުމަށް ފާސްކުރުން ކަމަށެވެ.
އަދި ރައީސަށް މަޖިލީހުގެ އަޣުލަބިއްޔަތު އޮތަސް، ބިލް ހުށައަޅަން ޖެހޭނީ ޕާޓީ މެދުވެރިކޮށް ކަމަށާއި އެމްޑީޕީގެ ޕީޖީ ލީޑަރ އަލީ އާޒިމް ވަނީ 20 ބިލެއް އެޕާޓީގެ ފަރާތުން ހުށައަޅަން ބޭނުންވާ ކަމަށް ބުނެ ސިޓީއެއް ހުށައަޅާފައި ކަމަށް ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ އެމްޑީޕީން ހުށައަޅާ 20 ބިލުގެ އިތުރުން ސަރުކާރުން ވެސް 34 ބިލެއް މިދައުރުގައި ހުށައަޅާނެ ކަމަށެވެ.