ކުންފުނިތަކަށް ބަދަލު ދިނުމުގެ ނަމުގައި ބޮޑެތި އަދަދުތަކުން ރައްޔިތުންގެ ފައިސާ ބަހަމުންދާއިރު އެކުރެވެނީ ވައްކަން ކަމަށް މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
މިއަދު އިދިކޮޅު ފަރާތްތަކުން މަޖިލިސް ކުރާ ގޭގެ ކުރިމަތީ ނޫސްވެރިންނާ ބައްދަލުކޮށް ވާހަކަ ދައްކަވަމުން ސައީދު ވިދާޅުވީ އަލިފާނުގެ ބޮޑު ހާދިސާއެއް ހިނގައި، އެތައް ބަޔަކު ހާލުގައި ޖެހިފައިވަނިކޮށް އެފަރާތްތަކަށް ވާން ޖެހޭ އެހީ ނުވަނީސް ސަރުކާރުން ބަދަލު ދިނުމަށް ކަމަށް ބުނެ ސެޓްލްމެންޓެއް ހަދާފައިވަނީ އޮންނަ އުސޫލާ ޚިލާފަށް ކަމަށެވެ.
"ފަންސާސް ދެ މިލިއަން ޑޮލަރު، އާބިޓްރޭޝަން މަރުހަލާގައި ނުދެވޭނެ. އެއީ އިންޓަނޭޝަނަލް ކޮމާސްގަ ކުރެވޭނެ ކަމެއް ނޫން،" ސައީދު ވިދާޅުވިއެވެ.
ނޫމަޑި ރިސޯޓުން ދައުލަތާ ދެކޮޅަށް ނެދަލޭންޑްސްގެ އާބިޓްރޭޝަން ކޯޓަށް ހުށައެޅި މައްސަލަ، ކޯޓުން ބޭރުގައި ދައުލަތުން ވަނީ ރައީސް ހުއްދައާ އެކު 848 މިލިއަން ރުފިޔާއަށް ސެޓްލް ކޮށްފައެވެ. އެކުންފުނިން ކޯޓަށް މައްސަލަ ހުށައެޅީ، ޔާމީންގެ ވެރިކަމުގައި ގަވާއިދާއި ޚިލާފަށް އެއްބަސްވުން އުވާލުމުން ބަދަލު ހޯދުމަށެވެ.
ނޫސްވެރިންނާ ވާހަކަ ދައްކަމުން ޕީޕީއެމްގެ ނައިބު، އަދި ނައިފަރު ދާއިރާގެ މެމްބަރު ޝިޔާމް ވިދާޅުވީ މިހާތަނަށް މިސަރުކާރުން 1.6 ބިލިއަން ރުފިޔާ، އެކި ފަރާތްތަކަށް ބަދަލުގެ ގޮތުގައި ދީފައިވާ ކަމަށާއި މިއީ ރައްޔިތުންގެ ފައިސާއިން ސަރުކާރު ކުރާ ވައްކަމެއް ކަމަށެވެ.
ކުރީ ސަރުކާރުގައި ވެސް މިގޮތަށް ކުންފުނިތަކުން ބަދަލު ހޯދަން ދައުވާ ކުރި ކަމަށާއި ނަމަވެސް، މިސަރުކާރުން ކަންތައް ކުރާ ގޮތަށް އާބިޓްރޭޝަން މަރުހަލާގައި ފައިސާ ދޫކޮށްފައިނުވާނެ ކަމަށް އޭނާ ވިދާޅުވިއެވެ. ސަރުކާރުން ދޭން ޖެހުނު ޖީއެމްއާރު ފައިސާގެ ތެރެއިން އާބިޓްރޭޝަނަށް ފަހު ދޭން ޖެހުނީ އެމީހުން އެދުނު ވަރަށް ވުރެ މާބޮޑުތަން ކުޑަ އަދަދެއް ކަމަށް ވެސް އޭނާ ވިދާޅުވިއެވެ. ސިންގަޕޫރުގެ އާބިޓްރޭޝަން ކޯޓުގައި ދައުވާ ކުރުމުން ބަދަލުގެ ގޮތުގައި ދިވެހި ސަރުކާރުން ވަނީ ޖީއެމްއާރަށް 271 މިލިއަން ޑޮލަރު ދައްކާފައެވެ.