ރާއްޖެއަށް އެންމެ ގިނައިން ފިޔާ އެތެރެކުރާ އިންޑިޔާއަށް ކުރި ވިއްސާރާގައި ދަނޑުތައް ހަލާކުވެ އިމްޕޯޓު ކުރުމުގައި ދަތިތަކެއް ކުރިމަތިވެ ރާއްޖޭގެ ފިޔާގެ އަގު އިންތިހާއަށް އުފުލިއްޖެއެވެ.
ބަސްތާއެއް މާލެއިން 800 އާއި 900ރ. އާ ދެމެދު ހުރިއިރު ރަށްރަށަށް ފިޔާ ގެނެސްގެން ވިއްކާ އަގު މާބޮޑަށް އުފުލިއްޖެއެވެ. ފިޔާ ކިލޯއެއް ފަންސާސް ރުފިޔާއަށް ވުރެ މައްޗަށް ގޮސްފައިވާއިރު ބާޒާރުން ފިޔާ ހުސްވުމާ ގާތަށް ވަނީ އައިސްފައެވެ.
ނަމަވެސް ސަރުކާރުން ބުނަނީ އިންޑިޔާއިން ރާއްޖެއަށް ފިޔާ ގެނައުމުގައި ދައްޗެއް ނޫޅޭނެ ކަމަށެވެ. އިންޑިޔާއިން ރާއްޖެއަށް ބޭނުންވާ ވަރަށް ފިޔާ ފޮނުވާނެ ކަމަށާއި، އެއްވެސް ބަނދަރެއްގައި ދައްޗެއް ނޫޅޭނެ ކަމަށް ފޮރިން މިނިސްޓްރީން ވެސް ވަނީ ބުނެފައެވެ.
ޚަބަރު ލިބޭ ގޮތުގައި ފިޔާ ނުލިބިގެން އުޅެނީ އިންޑިޔާއިން ދޫނުކޮށްގެނެއް ނޫނެވެ. ނަމަވެސް ފިޔާ ބަރު ކުރުމުގައި ބޯޓުތަކަށް ބަނދަރުން ބަރު ނުކުރެވި މައްސަލައެއް ޖެހިގެން ރާއްޖެއަށް ލިބުން ލަސްވީއެވެ. ބައެއް މީޑިޔާތަކުން ރިޕޯޓު ކުރާ ގޮތުގައި ވިޔަފާރިވެރިން މިހާރު ވަނީ އެހެން ބަނދަރަކުން ފިޔާ އެރުވުމުގެ މަސައްކަތް ފަށާފައެވެ.