ރަސޫލާއަށް ނިސްބަތްކޮށް އިހާނެތި ބަސްތަކެއް ހިމަނައި ރިޕޯޓެއް އާންމުކުރި މައްސަލާގައި މޯލްޑިވްސް ޑިމޮކްރަސީ ނެޓްވޯކް(އެމްޑީއެން) އާ މެދުވެސް ފިޔަވަޅު އަޅަން ޖެހޭ ކަމަށް ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައިވަނީ ރޭ ސަހީހް މުސްލިމްގެ ދިވެހި ތަރުޖަމާގެ 10 ވަނަ ބައި ނެރުމުގެ ރަސްމިއްޔާތުގައި އެމްޑީއެންގެ ރިޕޯޓު ދިފާއު ކުރައްވައި ދެއްކެވި ވާހަކައާ ގުޅިގެން ފާޑުކިޔުންތަކެއް އަމާޒުވެފައިވަނިކޮށެވެ.
ރައީސް ނަޝީދު މިއަދު ކުރެއްވި ޓުވީޓެއްގައި ވިދާޅުވީ، އެމްޑީއެން އަދި ހަނގުރާމައަށް މީހުން ފޮނުވާ ފަރާތްތަކާއި ގޮތް ނޭނގޭ މަރުތަކާ ގުޅޭ މީހުންނާ ދެކޮޅަށް ވެސް ފިޔަވަޅު އަޅަން ޖެހޭ ކަމަށެވެ.
ރޭ ބޭއްވި ޖަލްސާގައި އެމްޑީއެން ރިޕޯޓު ގޯސްވީ އިނގިރޭސި ބަހުން ލިޔެފައި ހުރުމުން ކަމަށް ވިދާޅުވެ ނަޝީދު ވަނީ އެ ރިޕޯޓަކީ ނަފްރަތު އުފައްދަން ކުރި ކަމެއް ކަމަށް ނުބެލޭ ކަމަށް ވިދާޅުވެފައެވެ.