ބްލޮގަރ ޔާމީން ރަޝީދު އަނިޔާވެރިކޮށް މަރާލި މައްސަލައިގެ ޝަރީއަތަށް ދައުލަތުން ހޯދާފައިވާ ސިއްރު ހެކިންނަށް ބަޔަކު ހަމަލާދީ ބިރު ދެއްކުމުގެ ސަބަބުން ދެ ހެކިން ހެކިބަސް ދޭން ދެކޮޅު ހަދާފައިވާ ކަމަށް މިއަދުގެ ޝަރީއަތުގައި ދައުލަތުގެ ވަކީލުން ބުނެފިއެވެ.
ޝަރީއަތުގެ މަޖިލީހުގައި ދައުލަތުގެ ވަކީލުން، އިތުރު ތަފްސީލެއް ނުދީ އެހެން ބުނުމުން ދިފާއީ ވަކީލުން ވަނީ މައްސަލަ ޖައްސާފައެވެ. ޔާމީން މަރާލުމުގައި ބައިވެރިވި ކަމުގެ ދައުވާ އުފުލާފައިވާ މ. އިރަސްމިކުގޭ އަހުމަދު ޒިހާން އިސްމާއިލްގެ ވަކީލް އަބްދުﷲ ހަސީން ވަނީ ދައުވާ ލިބޭ އެންމެން ތިބެނީ ބަންދުގައި ކަން ފާހަގަކޮށް، ސިއްރު ހެކިންނަކީ ކޮން ބައެއް ކަން އެނގޭ ހަމައެކަނި ފަރާތަކީ ދައުލަތުގެ ވަކީލުންނާއި ކޯޓުގެ އިތުރުން ފުލުހުން ކަމަށްވާތީ އެމީހުންނަށް ބަޔަކު ހަމަލާދިން ކަމަށް ބުނެ ވަކީ މީހަކަށް ނިސްބަތް ނުކޮށް ފުއްދާލުމުން ތުހުމަތު އަމާޒު ވަނީ ދިފާއީ ވަކީލުންނާއި ދައުވާ ލިބޭ ފަރާތްތަކަށް ކަމަށް ބުނެފައެވެ.
ފުލުހުން އެމައްސަލަ ވަކި މައްސަލައެއްގެ ގޮތުގައި ތަހުގީގު ކުރަން ޖެހޭ ކަމަށް ދައުވާ ލިބޭ އިސްމާއިލް ރަޝީދުގެ ވަކީލު، މައުމޫން ހަމީދުވެސް ވަނީ ޝަރީއަތުގައި ފާހަގަކޮށްފައެވެ. މައުމޫން ވެސް ވަނީ ހަސީން ފާހަގަކުރި ގޮތަށް ދައުލަތުން ވަކި ބަޔަކަށް ނިސްބަތް ނުކޮށް އެކަން ފާހަގަކުރުމުން ދިފާއަށް އަމާޒުވާ ކަމަށް ބުނެފައެވެ. ފުލުހުން އެ މައްސަލަ ތަހުގީގު ނުކުރާ ނަމަ ޝަރީއަތުން ފުލުހުންނަށް އެކަން ތަހުގީގު ކުރަން އަމުރުކުރުމަށް ވެސް މައުމޫން ވަނީ އެދިވަދައިގެންފައެވެ.
މިއަދުގެ ޝަރީއަތުގެ އަޑު އެހުމުގައި ވެސް ދައުލަތުން ހެކި ހާޒިރުކޮށް ހެކި ބަސް ނެގުމަށް ތާވަލް ކުރި ނަމަވެސް ދައުލަތުން ބުނެފައިވަނީ ބިރު ދެއްކުމާއި އަނިޔާ ކުރުމުގެ ސަބަބުން ބައެއް ހެކިން ހެކިބަސް ދޭން ދެކޮޅު ހެދުމުގެ ސަބަބުން ހާޒިރު ކުރެވުނީ އެންމެ ހެއްކެއް ކަމަށެވެ.
މިއަދުގެ ޝަރީއަތުގައި ދައުލަތުން ވަނީ ހާޒިރުނުވެ ހެކިބަސް ދޭން ދެކޮޅު ހެކިވެރިން ހެކިންގެ ގޮތުގައި ނަގާފައިވާކަން ޝަރީއަތަށް އަންގާފައެވެ. އަދި ދައުލަތުން ހުށަހަޅާފައިވާ ކްރައިމް ސީން އޮފިސާސް ރިޕޯޓްތަކުގެ ތެރެއިން ހަތަރު ރިޕޯޓެއް ވެސް، ރިޕޯޓް ހެދި ފުލުސް މީހާ ރާއްޖޭގައި ނެތުމުން ހެކިތަކުގެ ތެރެއިން އުނިކުރުމަށް ވަނީ ނިންމާފައެވެ.
ދައުލަތުން ހާޒިރުކުރި ހެކިވެރިޔާ ޝަރީއަތުގެ މަޖިލީހުގައި ބުނެފައިވަނީ ހާދިސާ ހިނގިތާ ވަރަށް ގިނަ ދުވަސްވެފައިވާތީ މިހާރު އެހާ ރަނގަޅަށް ހަނދާނުގައި ނެތް ކަމަށެވެ. ނަމަވެސް ފުލުހަށް ކުރިން ބަޔާނެއް ދިން ކަމަށާއި އެ ބަޔާނުގައި ވާނީ ތެދު މައުލޫމާތު ކަމަށް ބުނެފައިވެއެވެ.
ނަމަވެސް ޝަރީއަތުގައި ހެކިބަސް ދީފިނަމަ ބަލާނީ ޝަރީއަތުގައި ދިން ހެކިބަހަށް ވާތީ، ހެކިވެރިޔާ ހާދިސާ ހަނދާން ނެތް ކަމަށް ބުނުމުން ދައުލަތަށް ސުވާލު ނުކުރެވޭނެ ކަމަށް ދިފާއީ ވަކީލުން ފާހަގަކުރިއެވެ. ޝަރީއަތުން ނިންމީ ދައުލަތަށް ދެވަނަ ފަހަރަށް ސުވާލު ކުރުމުގެ ފުރުސަތު ދިނުމަށެވެ.
ދައުލަތުން ދެވަނަ ފަހަރަށް ސުވާލު ކުރިއިރު ވެސް ތަހުގީގު ބަޔާނުގައި ވަކި ގޮތަކަށް ބަޔާން ދިންކަމަށް ބުނެ ސުވާލު ކުރަން ފެށުމުން ދިފާއީ ވަކީލުން ވަނީ އެގޮތަށް ޝަރީއަތުގައި ހާޒިރުކޮށް ސުވާލު ނުކުރެވޭނެ ކަން ފާހަގަކޮށްފައެވެ. އެހިސާބުން މައްސަލަ ބައްލަވާ ގާޒީވެސް ވަނީ ދިފާއާ އެއްކޮޅަށް، ދައުލަތަށް އެގޮތަށް ސުވާލު ނުކުރެވޭނެ ކަމަށް ބުނެ ހުއްޓުވާފައެވެ.
ޝަރީއަތުގައި ހެކިވެރިޔާ ބުނީ، ޔާމީން މަރާލި ރޭ އެހިސާބުގައި ހުރި ކަމަށާއި ހުރީ ވެހިކަލެއްގައި މަޑުކޮށްގެން ކަމަށެވެ. ނަމަވެސް އެހިސާބުން ކަމެއް ހިނގިކަން ނޭނގޭ ކަމަށެވެ. އަދި އެތަނުގައި މަޑުކޮށްގެން ހުރި ވަގުތުވެސް ހަނދާން ނުވާ ކަމަށް ޝަރީއަތަށް ދިން ހެކިބަހުގައި ބުނެފައިވެއެވެ.
ނަމަވެސް މަގުގެ އަނެއް ކޮޅުގައި ސައިކަލެއްގެ މަތީ މީހަކު ހުރިހެން ހީވި ކަމަށާއި ޔަގީންކޮށް ބުނަން ނޭނގޭ ކަމަށް ހެކިވެރިޔާ ބުނެފައިވެއެވެ. އަދި އެހިސާބުން އަޑެއް އިވުނުތޯ ސުވާލުކުރުމުން ބުނީ އަޑެއް ވެސް އިވުނު ކަމަށެވެ. ނަމަވެސް އެއީ ކޮން ކަހަލަ އަޑެއް ކަމެއް ސާފު ނުވާ ކަމަށް ހެކިވެރިޔާ ބުނެފައިވެއެވެ.
ޔާމީންގެ ޝަރީއަތުގެ އަޑުއެހުމެއް ދެން ހަފްތާގައި ވެސް ބާއްވާނެ ކަމަށް މިއަދުގެ އަޑުއެހުން ނިންމާލަމުން ގާޒީ އަލީ ރަޝީދު އިއުލާން ކުރެއްވިއެވެ. މިމައްސަލާގައި އަދިވެސް ދައުލަތާއި ދިފާއުން ވެސް ގިނަ ހެކި ހުށައަޅާފައިވެއެވެ.