އައްޑޫގައި ހަރަކާތްތެރިވާ ސިޔާސީ ޕާޓިތަކުގެ އިސްވެ ހަރަކާތްތެރިވާ ބޭފުޅުންނާ އެކު އެކިއެކި ކަންކަމާއި ގުޅޭ ގޮތުން ބޭއްވިފައިވާ މަޝްވަރާ ބައްދަލުވުންތަކުގައި މަޝްވަރާކުރެވިފައިވާ ގޮތުގެ މަތީން ޕާޓީތަކުން އެއްބާރުލުން ދެއްވުމަށް އައްޑޫ ސިޓީ ކައުންސިލުން މިއަދު އެދިވަޑައިގެންފި އެވެ.
އައްޑޫ ސިޓީ ކައުންސިލްގެ އިދާރާއިން މިކަމާ ގުޅޭގޮތުން މިއަދު ޕާޓީތަކަށް ފޮނުވި ސިޓީގައި ވަނީ ޕާޓީތަކުން އެއްބާރުލުން ދޭން ޖެހޭ ކަންކަން ފާހަގަކޮށްފައިވެ އެވެ.
އޭގެ ތެރޭގައި އައްޑޫގެ ހުރިހާ ބަނދަރަކީ ވެސް ރައްޔިތުން ތަފާތު ބޭނުންތަކަށް ބޭނުން ކުރައްވަމުންދާ ބަނދަރުތަކަށްވެފައި އެއްވެސް ސިޔާސީ ކަމަކަށް ބަނދަރު ދާއިމީ ގޮތެއްގައި ބޭނުން ނުކުރެއްވުމާއި، އަދި އެއްވެސް ސިޔާސީ ހަރަކާތަކަށް ބަނދަރު ބޭނުން ކުރަން ބޭނުންވާ ނަމަ ކައުންސިލްގެ ހުއްދަ ހޯދައިގެން މުހިއްމު ކަންކަމުގައި ނޫނީ ބޭނުން ނުކުރުމާއި ސިޔާސީ ކަންކަމުގައި ބޭނުންކުރާ ތަކެތި (ޕޯސްޓަރު، ދިދަ، ދިދަފަތި އަދި ސިޔާސީ ޕާޓީ ކުލަ ހިމެނޭ އެއްވެސް ބާވަތެއްގެ އެއްޗެއް) ގަމުގެ ކޯޒްވޭ އަދި ގަމުގައި ބޭނުން ނުކުރުން ހިމެނެ އެވެ.
އަދި ސަރުކާރުގެ ނުވަތަ ރައްޔިތުންގެ އެއްވެސް އިމާރާތެއްގައި ނުވަތަ އިން ފާރުގައި ކައުންސިލްގެ ހުއްދަ ނެތި ކުލަ ލުމާއި، ޕޯސްޓަރު، ދިދަ، ދިދަފަތި ފަދަ ތަކެތި ބޭނުން ނުކުރުމާއި ސިޔާސީ ކަންކަމުގައި ގޭގެ ފާރުގައި ކުލަ ލުމާއި އަދި ޕޯސްޓަރު ހަރު ކުރުން ފަދަ ކަންކަމުގައި ގޭގެ ވެރިފަރާތުގެ ހުއްދަ ހޯދައިއިގެން ނޫނީ އެފަދަ ކަންކަން ނުކުރުމަށް އެދިފައިވެ އެވެ.
މީގެ އިތުރުން މިއަދު ޕާޓީތަކަށް ފޮނުއްވި ސިޓީގައި، މަގު ބައްތީގެ ހޮޅިދަނޑީގައި ބެނާ، ދިދަ، ހޮޅި ދަގަނޑަށް ގެއްލުން ނުވާ ގޮތަށް ހަރު ކުރެއްވި ކަމުގައި ވިއަސް، ބަނދަރުގެ ލައިޓުތަކުގެ ހޮޅިދަނޑީގައި އެއްވެސް ބާވަތެއްގެ އެއްޗެއް ހަރުނު ކުރެއްވުމަށާއި، މަގު ބައްތީގެ ހޮޅިދަނޑިތަކުގައި މަގު ހުރަހަށް ބެނާ، ދިދަފަތި ފަދަ ތަކެތި ހަރު ނުކުރުމަށް އެދިފައި ވެ އެވެ.
މިހާތަނަށްވެސް ޕާޓީތަކުން ކައުންސިލަށް ދެއްވަމުންދާ އެއްބާރުލުމަށް ޝުކުރު އަދާކޮށް، މިކަންކަމުގައިވެސް ޕާޓީތަކުގެ އެއްބާރުލުން ކައުންސިލަށް ލިބޭނެ ކަމަށް އުންމީދުކުރައްވާ ކަމުގައި ޕާޓީތަކަށް ފޮނުއްވި ސިޓީގައި ފާހަގަކޮށްފައިވެއެވެ.