ގައުމީ ޔުނިވަސިޓީގެ ކޯސްތައް ހިމްގުމަށް ސ. ހިތަދޫގައި އަލަށް އަޅާ ތިން ބުރީގެ ކްލާސް ރޫމް ބްލޮކްގެ ބިންގާ މިއަދު ރައީސް ޑރ. މުހައްމަދު ވަހީދު ހަސަން މަނިކު އަޅުއްވައި ދެއްވާ ގޮތަށް ހަމަޖެހިއްޖެ އެވެ.
ބިންގާ އެޅުމުގެ ރަސްމިއްޔާތު އޮންނާނީ މިއަދު ހަވީރު ކަމަށް ހިތަދޫ ކެމްޕަހުގެ މެނޭޖަރު މުހައްމަދުު ޖަމީލް މިއަދު ވިދާޅުވި އެވެ.
ކެމްޕަހަށް ދިމާވެފައިވާ ޖާގައިގެ ދަތިކަން ހައްލު ކުރަން އާ އިމާރާތެއް ހަދަން ކޮންޓްރެކްޓް އުސޫލުން ހިތަދޫ ބިއޭޕީސީ އާއި ގައުމީ ޔުނިވަސިޓީ އާ ދެމެދު ސޮއި ކުރީ ޖޫން 18، 2013 ގަ އެވެ.
ޔުނިވަސިޓީން ބުނީ މަސައްކަތް ފަށާތާ 300 ދުވަހުގެ ތެރޭގައި އިމާރާތްކޮށް ނިންމުމަށް ބީއޭޕީސީއާ މި ޕްރޮޖެކްޓް ހަވާލުކޮށްފައި ވަނީ 9.7 މިލިއަން ރުފިޔާ އަށް ކަމަށެވެ. އަދި ހިތަދޫ ކެމްޕަސް އަށް މި ބްލޮކް އިތުރުކުރުމުން ޖާގައިގެ ދަތިކަން ކޮންމެވެސް ވަރަކަށް ހައްލުވެގެން ދާނެ ކަމަށް ޔުނިވަސިޓީން ބުންޏެވެ.
ޔުނިވަސިޓީން ބުނީ އައްޑޫގައި ކޯސްތައް ހިންގުމަށް ޖާގައިގެ ދަތިކަން މިހާރު ވެސް ވަރަށް ބޮޑު ކަމަށާއި ބައެއް ކްލާސްތައް ހިންގަނީ ޝަރަފުއްދީންގެ ކްލާސްތައް ކުއްޔަށް ނަގައިގެން ކަމަށާއި އާ އިމާރާތް ލިބުމުން އާ ކޯސްތައް ފެށުމަށް ވެސް މަގުފަހިވެގެން ދާނެ ކަމަށެވެ.
މި އިމާރާތުގައި ހަ ކްލާސްރޫމްގެ އިތުރުން ސައިންސް ލެބަކާއި އިތުރު ލެބޯޓްރީއެއް ގާއިމުކުރުމަށް ހަމަޖައްސާފައިވާ ކަމަށް ވެސް ޔުނިވަސިޓީން ބުންޏެވެ.