ސީރިޔާ ފަދަ ގައުމުތަކުގައި ކުރަމުންދަނީ ޓެރަރިސްޓު ހަނގުރާމަތަކެއް ކަމަށާއި އެ ތަންތަނަށް ދިވެހިން ދާން ނުޖެހޭ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ދ.ހުޅުދެލި ރައްޔިތުންނާ ބައްދަލުކުރައްވާ ވާހަކަދައްކަވަމުން ރައީސް ސޯލިހު ވިދާޅުވީ ސީރިޔާގައި ކުރަމުންދާ ހަނގުރާމައިގައި ދިވެހި އެއްވެސް ރައްޔިތަކު ބައިވެރިވާން ނުޖެހޭ ކަމަށާއި އެއީ ދިވެހިން ކުރަންޖެހޭ ކަމެއް ނޫން ކަމަށެވެ.
"ސީރިޔާގައި އަފްގާނިސްތާނުގައި އެކުރާ ހަނގުރާމަތަކަކީ ޓެރަރިސްޓު ހަނގުރާމަތަކެއް. ދުނިޔެ ބަލައިގަންނަ ހަނގުރާމަތަކެއް ނޫން އެއީ" ރައީސް ވިދާޅުވިއެވެ.
ރައީސް ވިދާޅުވީ އެފަދަ ހަނގުރާމަތަކުގައި ދިވެހިން ބައިވެރިވެ ނުދިނުމަށްޓަކާ ކުރަންޖެހޭ ކޮންމެ ކަމެއްވެސް ކުރައްވާނެ ކަމަށެވެ. އަދި މިފަދަ ކަންކަމަށް ހިތްވަރުދީ ބާރުދޭ ފަރާތްތައް ހޯދާ އެކަން ވެސް ހުއްޓުވާނެ ކަމަށާއި އެއީ ރާއްޖޭގެ ސުލްހަށްޓަކާ އޭރަކު އޮންނަ ވެރިކަމަކުން ކުރަންޖެހޭ ކަމެއް ކަމަށްވެސް ރައީސް ސޯލިހު ވިދާޅުވިއެވެ.
މީގެއިތުރުން ރައްޔިތުންގެ ހަމަޖެހުމާއި ތަރައްގީއަށްޓަކާ ކުރަންޖެހޭ ކަންކަން ރާވައިގެން އަދި އިންތިޒާމުކޮށްގެން ކުރައްވަމުން ގެންދަވާނެ ކަމަށްވެސް ރައީސް ވިދާޅުވިއެވެ.
އައިއެސް ޖަމާއަތުން ސީރިޔާގައި ކުރަމުންދާ ހަނގުރާމައިގައި ބައިވެރިވުމަށް ދިވެހިންގެ ތެރެއިން ވެސް ބަޔަކު ގޮސްފައިވާއިރު ބައެއް ފަރާތްތައް މިހާރު ތިބީ ރެފިއުޖީ ކޭމްޕުތަކުގައެވެ. އެގޮތުން ރެފިއުޖީ ކޭމްޕްތަކުގައި ހާލުގައި ޖެހިފައިވާ ތިބި ދިވެހިން ކުރިއަށް ދެ މަހެއްހާ ދުވަހުގެ ތެރޭގައި ރާއްޖެއަށް ގެންނާނެ ކަމަށްވެސް ރައީސް ވަނީ މީގެކުރިން ވިދާޅުވެފައެވެ.