މޯލްޑިވިއަން ޑިމޮކްރަޓިކް ޕާޓީގެ ނައިބު ރައީސްގެ މަގާމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވާދަކުރައްވަން ނިންމަވައިފިއެވެ.
އެމްޑީޕީގެ ފަރާތުން 19 ވަނަ ރައްޔިތުންގެ މަޖިލީހުގެ ރައީސްގެ މަގާމަށް ވެސް ވާދަކުރެއްވި އަސްލަމް، ޕާޓީގެ ނައިބުގެ މަގާމަށް ވާދަ ކުރަން ނިންމައި، އާދީއްތަ ދުވަހު ފޯމު ހުށައަޅުއްވާނެ ކަމަށް ވަނީ ވިދާޅުވެފައެވެ.
ނިމިގެން ދިޔަ ދައުރުގައި ޕާޓީގެ ނައިބު ރައީސްގެ މަގާމު ފުރުއްވީ ރައީސް އޮފީހުގެ މިނިސްޓަރު އަދި ކުރީގެ ބާރަށު ދާއިރާގެ މެމްބަރު މުހައްމަދު ޝިފާޒެވެ. ޝިފާޒު މިފަހަރުވެސް އެ މަގާމަށް ވާދަ ކުރައްވާނެކަން އިއުލާން ކޮށްފައިވާއިރު، އަސްލަމް ވިދާޅުވީ ޝިފާޒު ބަލިކޮށް މަގާމު ކާމިޔާބު ކުރެވޭނެ ކަމަށެވެ.
ރައްޔިތުންގެ މަޖިލީހުގެ މެމްބަރެއްގެ ގޮތުގައި ފާއިތުވެދިޔަ ފަނަރަ އަހަރު މަޖިލީހުގައި ހޭދަކުރެއްވި އަސްލަމަކީ މިހާރު މަޖިލީހުގައި ހުރި އެންމެ ތަޖުރިބާކާރު އެއް މެމްބަރުވެސްމެއެވެ. މަޖިލިސް ރައީސްގެ މަގާމަށް އަސްލަމް ވާދަނުކޮށް ފަހު ވަގުތު ވަނީ އެމްޑީޕީގެ ރައީސް މުހައްމަދު ނަޝީދުގެ ނަންފުޅު އެމަގާމަށް ހުށައަޅާފައެވެ. އެއާއެކު އަސްލަމާ ވާދަކުރެއްވި ވިލުފުށި ދާއިރާގެ މެމްބަރު ހަސަން އަފީފު ވެސް ވަނީ ނަޝީދަށް ތާއީދުކޮށް ނަން އަނބުރާ ގެންގޮސްފައެވެ.