ނިމިގެން ދިޔަ ސަރުކާރުގައި ވެސް މިނިވަން މުއައްސަސާއެއްގެ ގޮތުގައި އެންޓި ކޮރަޕްޝަން ކޮމިޝަނުގެ ނަމުގައި ކޮމިޝަނެއް އޮތެވެ. ނަމަވެސް އެ ކޮމިޝަން ފެނިގެން ދިޔައީ ސަރުކާރު ބޯ އަނބުރާލާ ގޮތަކަށް ބޯ އަނބުރާލާ، ސަރުކާރުން ބަލަން ބޭނުން ނޫން މައްސަލަތައް އެއްކާރިކޮށްލުމަށް ފަހު މަސައްކަތާއިގެން ކުރިއަށްދާ ކޮމިޝަނެއްގެ ގޮތުގައެވެ.
އޭރުގެ ރައީސުލް ޖުމުހޫރިއްޔާއާއެކު ސިޔާސީ ހަފްލާތަކުގައި އޭސީސީގެ ރައީސް އިންނެވުމަކީ އެއީ ނުފޫޒު ފޯރުވުން ނޫން ކަމަށް އޭރު ބުނެވުނެވެ. ނަމަވެސް ރައީސްގެ މަސްލަހަތު ހިމެނޭ ކަންކަމުގައި ލުއި ގޮތްތަކެއް ނެންގެވި ކަމަށް ރައީސް ޔާމީންގެ ވެރިކަމުގެ ދައުރު ނިމި އާވެރިކަން ފެށުމުން ހާމަވެގެން ދިޔައެވެ. އަދި ސަރުކާރުގެ އިސް ސަފުގައި ތިއްބެވި ބޭފުޅުންގެ މައްސަލަތައް ބެލުނު ގޮތް ވަރަށް ތަފާތު ވެގެން ދިޔައެވެ.
މިއަދު އާ މެމްބަރުންނާއެކު އާ ރައީސާއެއްގެ ރިޔާސަތުގައި އާ ކޮމިޝަނެއް ހަރަކާތްތެރިވަމުން އަންނައިރު ރައްޔިތުންނަށް އުއްމީދީ ބަދަލުތަކެއް ފެންނާން ފަށައިފިއެވެ. ރައްޔިތުންގެ ފައިސާއަށް ޚިޔާނާތްތެރި ނުވެ ޚިދުމަތް ދޭން ތިބި އިސް ފަރާތްތަކުން ކުރާ ކަންތައް ފަސް ޖެހުމެއް ނެތި ބަލާ ކޮމިޝަނަކަށް އޭސީސީ އަނެއްކާވެސް ވާން ފަށައިފިއެވެ.
އަދި ފަރުދާގެ އަނެއް ފަރާތުން ހިންގާ ކަންކަން ފަރުދާގެ ކުރިމައްޗަށް ގެނެސް ސަރުކާރުގެ "ޒީރޯ ޓޮލަރެންސް" ސިޔާސަތު ތަންފީޒު ކުރާތަން ފެންނާން ފަށައިފިއެވެ. މިކަން ފެނިގެން ގޮސްފައިވަނީ އޭސީސީން ބަލަމުން އައި މައްސަލައަކަށް ރައީސް އޮފީހުގެ މިނިސްޓަރ އަހުމަދު ސަމީރު އަތް ބާނަން މަސައްކަތް ކުރިކަން އޭސީސީގެ ރައީސް އާއިޝަތު ޝިއުނާ އިއުލާން ކުރެއްވުމާއެކުގައެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި އިއްޔެ ޝިއުނާ އެވާހަކަތައް ކިޔާ ދީފައެވެ. ޝިއުނާ ވިދާޅުވީ އޭސީސީ އިން ބަލަމުން ދިޔަ މައްސަލައަކާ ގުޅިގެން ސަމީރު އޭނާއަށް ގުޅުއްވައި ދެއްކެވި ވާހަކަތަކުން އެހެން ބޭނުމެއްގައި ގުޅުއްވިކަން އެނގިގެން ދިޔަ ކަމަށެވެ.
ސްޓޭޓް މިނިސްޓަރެއްގެ މައްސަލަ ބަލަމުންދާއިރު އޭނާ ވަކީލަކާއެކު އޭސީސީއަށް ހާޒިރުވާން އެންގުމުން އެކަމާ ގުޅިގެން ސަމީރު ގުޅުއްވުމުން އެއީ ނުފޫޒު ފޯރުވާން ކުރި ކަމެއްގެ ގޮތުގައި ބެލެވޭނެ ޖާގަ އޮތް ކަމަށް ޝިއުނާ ގަބޫލު ކުރައްވައެވެ. ނަމަވެސް ސަމީރު ވަނީ އޭސީސީގެ ތަހުގީގަކަށް ނުފޫޒު ފޯރުވުމުގެ ގޮތުން އެއްވެސް ކަމެއް ކުރެވުނު ކަމަށް ގަބޫލު ނުކުރައްވާ ކަމަށް ވިދާޅުވެފައެވެ.
ޝިއުނާ ވަނީ މީގެ ކުރިން ކަން ހިނގާ ދިޔަ ގޮތަށް އޭސީސީ ދެން ކަންތައް ނުކުރާނެކަމުގެ ޔަގީންކަން އަރުވާފައެވެ. ސަރުކާރުގެ ނުފޫޒުގަދަ ބޭފުޅުންގެ ފޯނު ކޯލަކާއެކު ބަލަމުންދާ މައްސަލައެއް މަޑު ޖައްސާލައި ނުވަތަ ސްޕީޑު ބާރުކޮށްލަން މަސައްކަތް ނުކުރެއްވުމަށް ނުސީދާ ގޮތުން އިއްޔެގެ ކޮމިޓީ ބައްދަލުވުމުގައި ވަނީ އެދިވަޑައިގެންފައެވެ.
އޭސީސީއަށް މަޖިލިސް ތެރެއިން ވެސް ވަނީ އިއްޔެ ސަޕޯޓު ލިބިފައެވެ. އެގޮތުން އެމްޑީޕީގެ މެމްބަރުން ކަމަށްވާ ދާންދޫ ދާއިރާގެ މެމްބަރު ޔައުގޫބު އަބްދުﷲ އަދި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވަނީ ނުފޫޒު ފޯރުވާ މައްސަލަ ބަލަން ގޮވާލާފައެވެ.