ބޭރުގެ ހަނގުރާމަތަކަށް ދިވެހިން ފޮނުވުމާއި ދީނީ ހަރުކަށި ފިކުރު ފެތުރުމުގައި އިސްކޮށް ހަރަކާތްތެރިވާ ކަމުގެ ތުހުމަތުގައި ރޭ ފުލުހުން މާލޭގައި 35 އަހަރުގެ ފިރިހެނަކު ހައްޔަރުކޮށްފިއެވެ.
ޓެރަރިޒަމާއި ހަރުކަށި ފިކުރު ހުއްޓުވުމަށް ސަރުކާރުން ފެށި މަސައްކަތުގައި ޓެރަރިޒަމްގެ ގާނޫނަށް ބަދަލުތަކެއް ގެނެސް ފުލުހުންނަށް ބޮޑެތި ބާރުތަކެއް ދީފައިވާއިރު މިއީ ގާނޫނު ބަދަލުކުރި ފަހުން ހައްޔަރުކުރި ފުރަތަމަ މީހާއެވެ.
މިދިޔަ ސެޕްޓެމްބަރު އެއްވަނަ ދުވަހު މަރު ކޮމިޝަންގެ ރައީސް ހުސްނުއްސުއޫދު ވަނީ ރާއްޖޭގައި ހަރުކަށި ފިކުރު ފަތުރަމުންދާ މިންވަރު އިތުރު ވެފައިވާ ކަމަށާއި އޭގެ ނުރައްކާ، ކުރިން ހީކުރި ވަރަށް ވުރެ ބޮޑުވެފައިވާ ކަން ދަނެގަނެވިފައިވާ ކަމަށެވެ.
ސުއޫދު އިތުރަށް ވިދާޅުވީ މިކަމުގައި ހަރަކާތްތެރިވާ މީހުން ދަނެގަނެވިފައިވާ ކަމަށާއި އޭގައި މިކަންކަމަށް ޚަރަދު ކުރާ މީހުންގެ އިތުރުން އަމަލީ ގޮތުން ހަރަކާތްތެރިވާ މީހުންނާއި މީހުން ރެކްރޫޓް ކުރާ މީހުން ވެސް ހޯދިފައިވާ ކަމަށެވެ.
ފުލުހުން ބުނެފައިވަނީ ރޭ ހައްޔަރުކުރި މީހާ އަކީ ރާއްޖެއިން ބޭރުގައި ހިނގާ ހަނގުރާމަތަކަށް ދިވެހީން ފޮނުވައި، އަދި ހަނގުރާމަވެރި ޖަމާއަތްތަކަށް މީހުން ރެކްރޫޓުކުރުމުގައި އިސްކޮށް ހަރަކާތްތެރިވާކަމަށް ތުހުމަތުކުރެވޭ މީހެއް ކަމަށެވެ.