މޯލްޑިވްސް ލައިފްގާޑް އެސޯސިއޭޝަން އިން އިންތިޒާމްކޮށްގެން އައްޑޫގައި ބާއްވާ 'ރަން ސްވިމް' ބޮޑު އިވެންޓު ނޮވެމްބަރު 15 ގައި ބާއްވަން ނިންމައިފިއެވެ.
ރަން ސްވިމްއަކީ ހިތަދޫ ފަތާ ޓްރެކުން ފެށިގެން ލިންކު ރޯޑުގައި ވަކި މިންވަރަކަށް ދުވުމަށް ފަހު އެނބުރި ފަތާ ޓްރެކާ ހަމައަށް އައިސް، މޫދުގައި ވަކި މިންވަރަކަށް ފެތުމަށް ފަހު ނިންމާލާ ރޭހެކެވެ.
އެކި އުމުރުފުރާއަށް އެކި ލެވެލްތަކުގައި ބައިވެރިވެ ވާދަކުރުމުގެ ފުރުސަތު ހުޅުވާލެވިފައިވާއިރު، 6 އަހަރުން ދަށާއި، 8 އަހަރުން ދަށުގެ ކުދިންނަށް ޕާޓްނަރެއް ވެސް ގެނެވޭނެއެވެ. މީގައި، އެއް ކުއްޖަކު 1 ކިލޯ މީޓަރު ދުވުމަށް ފަހު ދެވަނަ ކުއްޖާ 500 މީޓަރަށް ފަތާނީއެވެ. ނަމަވެސް ފަތާ ކުއްޖާއަށް ފެތޭނީ ދުވާ ކުއްޖާ ރޭސް ނިންމާލުމުންނެވެ.
ދިހަ އަހަރަށްވުރެ ކުޑަ ކުދިންނަށް ވެސް ޕާޓްނަރަކު ގެނެވޭއިރު ދުވާ ކުއްޖާ 3 ކިލޯ މީޓަރުގެ ދުވުމެއް ނިންމުމުން ފަތާ ކުއްޖާ އެއް ކިލޯ މީޓަރުގެ ފެތުމެއް ނިންމަން ޖެހޭނެއެވެ. 12، 14 އަދި 16 އަހަރުން ދަށުގެ ކުދިންނަށް ޕާޓްނަރަކު ބައިވެރިނުކުރެވޭނެއެވެ. ނަމަވެސް މިއުމުރުފުރާގައި ދުވަން ޖެހެނީ 3 ކިލޯމީޓަރުގެ ދުވުމެކެވެ. އެއަށްފަހު 1.5 ކިލޯ މީޓަރަށް ފެތުމުން ރޭސް ނިމުނީއެވެ. ނުވަތަ 2 ކިލޯމީޓަރުގެ ދުވުން ނިންމާލުމަށް ފަހު 4 ކިލޯމީޓަރަށް ފެތުމުން ރޭސް ނިމޭނެއެވެ.
ބޮޑެތި މީހުންނަށް މާސްޓާ ލެވެލް ހެދިފައި އޮތް އިރު މާސްޓާ ލެވެލް އެކެއްގައި 5 ކިލޯމީޓަރުގެ ދުވުމަކަށް ފަހު 1 ކިލޯ މީޓަރަށް ފަތަން ޖެހެއެވެ. މާސްޓާ ލެވެލް ދޭއްގައި ތިން ކިލޯމީޓަރު ދުވުމަށް ފަހު ތިން ކިލޯމީޓަރު ފަތަން ވެސް ޖެހެއެވެ. މާސްޓާ ލެވެލްގައި ވެސް ޕާޓްނަރަކާ އެކު ދުވުމުގެ ފުރުސަތު ވަނީ ހުޅުވާލެވިފައެވެ. މިލެވެލްގައި ވެސް ފެތުންތެރިޔާއަށް ފެތޭނީ ދުވުންތެރިޔާ ރޭސް ނިންމާލުމުންނެވެ.
ދުވުމުގައި ބައިވެރިވުމަށް 250ރ. ގެ ފީއެއް ދައްކަން ޖެހެއެވެ. މާސްޓާ ލެވެލްގައި ޕާޓްނަރު ގެންނަ ފަރާތްތަކުން ދެމީހުންނަށް ޖުމުލަ 400ރ. ގެ ރެޖިސްޓްރޭޝަން ފީއެއް ދައްކަން ޖެހޭނެއެވެ.
މިއީ ދުނިޔޭގެ އެކިކަންކޮޅުތަކުގައި ވަރަށް ފޯރިގަދަކަމާއެކު ބާއްވާ ހަރަކާތަކަށްވާއިރު މިއީ އައްޑޫގައި މިފަދަ ހަރަކާތެއް ބޭއްވޭ ފުރަތަމަ ފަހަރުކަން ފާހަގަކޮށްލެވެއެވެ. މި އިވެންޓުގައި ބައިވެރިވުމަށް ބޭނުންވާ ފަރާތްތަކަށް މާދަމާގެ ނިޔަލަށް ބައިވެރިވުމުގެ ފުރުސަތު އެބަ އޮތެވެ.
ބައިވެރިވުމަށް މިލިންކަށް ފިއްތަވާލައްވާ.