ހިތަދޫން 25،000 އަކަފޫޓުގެ ބިމެއް ހިލޭ ވިލާ އެޑިއުކޭޝަނަލް ސާވިސް ޕްރައިވެޓް ލިމިޓެޑަށް ދިން މައްސަލައެއް އެންޓި ކަރަޕްޝަން ކަމިޝަން (އޭސީސީ) އިން ބަލަން ފަށައިފިއެވެ.
އޭސީސީން ބުނީ އައްޑޫ ސިޓީ ކައުންސިލުން ވިލާއަށް ބޮޑު ބިމެއް ދިން މައްސަލައެއް ހުށަހެޅިފައިވާ ކަމަށެވެ.
އައްޑޫ ސިޓީ ކައުންސިލުން ވަނީ މި މަހުގެ 21 ވަނަ ދުވަހު މަތީ ތައުލީމުދޭ އިންސްޓިޓިއުޓެއް ގާއިމް ކުރުމަށް 25،000 އަކަ ފޫޓުގެ ބިމެއް މުޅިން ހިލޭ ދޭން ނިންމައި އެއްބަސްވުމުގައި ސޮއކިކޮށްފައެވެ.
ކައުންސިލުން ވިލާއަށް ބޮޑު ބިމެއް ހަމަޖައްސައިދިނީ މީގެ ކުރިން 45،000 އަކަ ފޫޓުގެ ބިމެއް ވިލާއަށް ހަމަޖައްސަން އުޅުމުން އެކަމާއި ކައުންސިލްގެ ބައެއް މެމްބަރުން ހިތްހަމަނުޖެހި މައްސަލަ އުފެދުމާއި ގުޅިގެންނެވެ.
ކުރިން ވިލާ ކޮލެޖަށް ކައުންސިލުން ހަމަޖައްސަން އުޅުނު ބިމަކީ ހިތަދޫ ކްރެސްގާޑަން ރެސްޓޯރެންޓާއި ލިންކު ރޯޑާއި ދެމެދުން 45،000 އަކަފޫޓުގެ ބިމެކެވެ.
ވިލާ ކޮލެޖަށް ބޮޑު ބިމެއް އިއްލާން ކުރުމެއްނެތި ދިނުމަށް ފުރަތަމަ ކައުންސިލަށް ހުށަހެޅީ އައްޑޫގައި ވިލާ ކޮލެޖުގެ ކަންކަމާއި ދާދި ފަހަކާއި ޖެހެންދެން އިސްކޮށް ހަރަކާތްތެރިވި އައްޑޫ ޑެޕިއުޓީ މޭޔަރ މުހައްމަދު ޔަސްރިފްއެވެ.
ޔަސްރިފު ހުށަހެޅި މައްސަލަ ބަލައި ގަނެ ކައުންސިލް މެމްބަރުންގެ މެދުގައި ވަރަށް ބޮޑަށް ހިޔާލު ތަފާތުވެ ފަހުން ނިންމާފައިވަނީ އިއްލާންކޮށްގެން ބިން ދޫކުރުމަށެވެ. އެގޮތަށް ނިންމައި ކައުންސިލުން އިއްލާން ކުރިއިރު އެ ބިމަށް އެދި ކުރިމަތިލެވޭ ޝަރުޠު ވަނީ ވަރަށް ބޮޑަށް ހަނިކޮށް ވަކި ބަޔަކަށް ފުރުސަތު ލިބޭ ގޮތަށް ބަދަލު ގެނެސްފައި ކަމަށް އޭރު ބިން ހޯދުމަށް ބިޑް ގަތް ބައެއް މީހުން ބުނެފައިވެއެވެ.
ކައުންސިލުން ވިލާއަށް ބިން ދޭން އެއްބަސްވުމުގައި ސޮއިކޮށްފައިވާ އިރު މިކަމުގެ ތަފްސީލެއް ހާމަ ކޮށްފައި ނުވެއެވެ.