ހިތަދޫ ރީޖަނަލް ހޮސްޕިޓަލްގައި މިވަގުތު ފަރުވާ ދެމުން އަންނަ އަންހެނުންގެ ހާއްސަ ޑޮކްޓަރު މިމަހު ފުރާތީ އާ ޑޮކްޓަރަކު މިމަހުގެ 13 ވަނަ ދުވަހު އައްޑޫ އަށް އަންނާނެ ކަމަށް ހިތަދޫ ރީޖަނަލް ހޮސްޕިޓަލުން ބުނެފިއެވެ.
ހިތަދޫ ރީޖަނަލް ހޮސްޕިޓަލް ހިންގުމާއި ހަވާލުވެ ހުންނެވި ހަދީޖާ ހަފްސާ މިއަދު ވިދާޅުވީ ހޮސްޕިޓަލްގައި މިވަގުތު ފަރުވާ ދެމުން އަންނަ ޑޮކްޓަރު މިމަހުގެ 13 ވަނަ ދުވަހު ފުރާ ގޮތަށް ހަމަޖެހިފައިވަނިކޮށް މި މަހުގެ 25 އަށް އޭނާ ފުރުން ލަސްކޮށްފައިވާ ކަމަށެވެ.
ހަފްސާ ވިދާޅުވީ މިހާރު ހުރި ޑޮކްޓަރު ހިތަދޫ ރީޖަނަލް ހޮސްޕިޓަލަށް އައިސްފައިވަނީ ދެ މަހުގެ މުއްދަތަށް ކަމަށެވެ، އަދި އެ މުއްދަތު މި މަހުގެ 13 އަށް ހަމަވާ ކަމަށެވެ.
"މިހާރު ހުރި ޑޮކްޓަރު މިކޮޅަށް އައީ ދެ މަސްދުވަހަށް. އޭނާ ފުރާތީވެ އާ ޑޮކްޓަރަކު އެބަ އާދޭ. މިއަދު އޭނާގެ ޓިކެޓްވެސް ވަނީ ލިބިފައި" ހަފްސާ ވިދާޅުވިއެވެ.
ހިތަދޫ ރީޖަނަލް ހޮސްޕިޓަލްގައި ކުރިން ހުރި އަންހެނުންގެ ހާއްސަ ޑޮކްޓަރުގެ ފަރުވާ ކުޑަކަމާއި ހެދި އޭނާ ބޭރުކުރުމަށް އާއްމުން މުޒާހަރާ ކުރުމާއި ގުޅިގެން އައި ޑޮކްޓަރުގެ ފަރާތުން މާ ބޮޑު މައްސަލައެއް އަދި ފެންމަތި ވެފައި ނުވެއެވެ.
ހޮސްޕިޓަލުން ބުނީ މިމަހުގެ 13 އިން ފެށިގެން މިހާރު ހުރި ޑޮކްޓަރު 25 ގައި ފުރަންދެން ދެ ޑޮކްޓަރުން ބަލި މީހުންނަށް ފަރުވާ ދެމުން ގެންދާނެކަމަށެވެ.
މައުލޫމާތު ލިބިފައިވާ ގޮތުގައި ފުވައްމުލަކުގައި ވެސް އަންހެނުންގެ ހާއްސަ ޑޮކްޓަރަކު ނެތެވެ. އެހެންވެ ފުވައްމުލަކު މީހުންވެސް މިހާރު ވިހަން އަންނަނީ ހިތަދޫ ރީޖަނަލް ހޮސްޕިޓަލަށެވެ.