އައްޑޫގެ ޕަބްލިކް ވޯކްސް ސައިޓުގައި މަސައްކަތްކުރާ 124 މުވައްޒަފުންގެ ވަގުތީ ކޮންޓްރެކްޓު މިރޭގެ ނިޔަލަށް ހަމަވާއިރު، އެ މުވައްޒަފުންނަށް ރަނގަޅު ގޮތެއް ހޯދާނުދީ މިއަދު ގެއަށް ވަޑައިނުގަންނަވާނެ ކަމުގެ ޔަގީންކަން އައްޑޫ މޭޔަރ އަބްދުﷲ ސޯދިގު އަރުވައިފިއެވެ.
އިއްޔެ ޕަބްލިކް ވޯކްސްގެ މުވައްޒަފުން، ރައީސުލް ޖުމުހޫރިއްޔާއަށް ފޮނުއްވި ޕެޓިޝަނުގެ ޖަވާބު ހޯދުމަށް މިއަދު ސިޓީ ކައުންސިލަށް ދިއުމުން މޭޔަރ ވިދާޅުވީ ކައުންސިލްގެ ސިޓީއަކާއެކު ޕެޓިޝަން ރައީސް އޮފީހަށް މިހާރު ފޮނުވާފައިވާ ކަމަށެވެ. ނަމަވެސް މިއަދު މެންދުރު 12:00 އާ ހަމައަށް ރަސްމީ ގޮތުން ޖަވާބެއް ލިބިފައިނުވާކަން މޭޔަރ ފާހަގަކުރެއްވިއެވެ.
ސޯބެ ވިދާޅުވީ، ކައުންސިލުން ރައީސުލް ޖުމުހޫރިއްޔާ އަށް ފޮނުއްވި ސިޓީގައި އައްޑޫ ޕަބްލިކް ވޯކްސްގައި ތިބި މުވައްޒަފުންނަކީ އެތައް ދުވަހެއް ވަންދެން މިތާ މަސައްކަތް ކުރަމުން އައި ބަޔެއް ކަމަށާއި، އެ މުވައްޒަފުންގެ މަސައްކަތާއި އަލަށް ހުށައެޅުނު ސިވިލް ސާވިސްގެ މުސާރައިގެ އޮނިގަނޑާ ނުބައްދަލު ކަން ފާހަގަކުރެއްވި ކަމަށެވެ.
އަދި މުވައްޒަފުންނަށް މިއަދު އޮފީހުން ގެއަށް ވަޑައިގެންނެވުމުގެ ކުރިން ހައްލެއް ހޯދާ ދެއްވާނެ ކަމުގެ ޔަގީންކަން މޭޔަރ އެރުވި ކަމަށް "އައްޑޫލައިވް" އަށް މައުލޫމާތު ދެމުން ޕަބްލިކް ވޯކްސްގެ ބޭފުޅަކު ކިޔާދީފައިވެއެވެ. އެއީ ޕްލޭނިން މިނިސްޓްރީގެ ދަށުގައި މިހާރު ތިބި 124 މުވައްޒަފުން ކައުންސިލްގެ ދަށަށް ބަދަލުކޮށްދިނުން ނުވަތަ އަލަށް ދީފައިވާ ކޮންޓްރެކްޓުގައި ކުރިއެކޭވެސް އެއްގޮތަށް ލިބެމުން އައި މުސާރަ ލިބޭ ގޮތަށް ހަމަޖައްސައި ދެވޭނެ ގޮތެއް ރައީސް އޮފީހުން މަގުފަހި ކޮށްދިނުން ކަމަށް ސޯބެ ވިދާޅުވިއެވެ.
މިރޭގެ ނިޔަލަށް ޕްލޭނިން މިނިސްޓްރީން އިތުރުކޮށްދީފައިވާ ކޮންޓްރެކްޓުތަކުގެ މުއްދަތު ހަމަވާއިރު 124 މުވައްޒަފުންގެ ވަޒީފާ މިރޭ 12:00 ގައި ގެއްލޭނެއެވެ. ޕްލޭނިން މިނިސްޓްރީން މިމަހުގެ ހޯމަ ދުވަހު ވަނީ މުވައްޒަފުންނަށް ސިވިލް ސާވިސްގެ މުވައްޒަފުންގެ ގޮތުގައި ބަދަލުވުމަށް ފޯމެއް ފުރުމަށް އަންގާފައެވެ. ނަމަވެސް އައްޑޫ ސައިޓުގެ އެއްވެސް މުވައްޒަފަކު އެ ފޯމު ފުރުމަށް ފަހު ސިވިލް ސާވިސްއަށް ފޮނުވާފައެއް ނުވެއެވެ.
މިރޭ 12:00 އިން ފެށިގެން އައްޑޫ ޕަބްލިކް ވޯކްސް ސައިޓުގެ އެއްވެސް މުވައްޒަފަކު ވަޒީފާގައި ނުހުންނާނެއިރު އައްޑޫގެ ތިން ސައިޓުގައި ތިބި ހުރިހާ މުދަލާއި އިމާރާތްތަކާ ހަވާލުވާނެ ބަޔަކުވެސް ޕްލޭނިން މިނިސްޓްރީން ހަމަޖައްސާފައި ނުވާކަން ފާހަގަކުރެވެއެވެ.