މިސަރުކާރަށް އަހަރެއް ނުވަނީސް، ސަރުކާރު ގެނައުމަށް ގިނަ މަސައްކަތްތަކެއް ކުރިކަމަށް ދައުވާ ކުރާ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު، ރައީސުލް ޖުމުހޫރިއްޔާއަށް ވަގަށް ގޮވައިފިއެވެ.
ރައީސް އޮފީހާ ހަވާލުވިތާ މާގިނަ ދުވަހެއް ނުވަނީ ރައީސްގެ ޚާއްސަ މަންދޫބެއްގެ ގޮތުގައި ހަމަޖެއްސެވި ޖާބިރު ކުއްލިއަކަށް ރައީސާ ދެކޮޅު ވެފައިވަނީ އެމަނިކުފާނުގެ އަނބިކަނބަލުން ދިޔާނާ ސައީދުގެ ބަދަލުގައި ރައީސް ފޮނުއްވި މަހާޒް އެ މަގާމަށް މަޖިލީހުން އައްޔަން ކޮށްފައިވަނިކޮށެވެ.
ދެފަހަރެއްގެ މަތިން ޖާބިރު، ރައީސަށް ފާޑުވިދާޅުވެފައިވާއިރު މިއަދުގެ ޖަލްސާގައި ފާޅުގައި ރައީސް ސޯލިހަކީ ވަގެއް ކަމަށް އޭނާ ގޮވިއެވެ.
ގިނަ ދުވަސްވަންދެން މަޖިލީހުގައި ރައީސް އިންނެވީ މަކަރާ ހީލަތުން ކަމަށާއި، އެމްޑީޕީއަށް ލިބުނު ވެރިކަން، އެމަނިކުފާނު "ފޭރިގަނެފައިވާ" ކަމަށް ޖާބިރު ވިދާޅުވިއެވެ. އަދި ފޭރިގަތީ ގާސިމް އިބްރާހީމާއި އަދާލަތު ޕާޓީއާ ގުޅިގެން ކަމަށާއި ރައީސް މަގާމުން ދުރުކުރުމަށް އެމްޑީޕީ އެކްޓިވިސްޓުންނަށް ވަނީ ގޮވާލާފައެވެ.