ޖުމުހޫރީ ޕާޓީގެ ލީޑަރ ގާސިމް އިބްރާހިމްގެ އެޑްވައިޒަރުގެ މަގާމުން ދަނގެތީ ދާއިރާގެ މެމްބަރު މުހައްމަދު ނާޒިމް އިސްތިއުފާ ދެއްވުމާ ގުޅިގެން، ޕާޓީގެ އާ ސެކެޓްރީ ޖެނެރަލް އަލީ އާރިފް ފާޑުވިދާޅުވެއްޖެއެވެ.
ކެލާ ދާއިރާގެ ކުރީގެ މެމްބަރު ނިމިގެން ދިޔަ މަޖިލިސް އިންތިޚާބަށް ފަހު ޖޭޕީއާ ގުޅިވަޑައިގެން ގާސިމާއެކު މިހާރު މަސައްކަތް ކުރަމުން އަންނަ އިރު އާރިފް ވިދާޅުވީ، ނިމިގެން ދިޔަ ސަރުކާރުގައި ނާޒިމަށް ނުހައްގުން ލިބުނު އަނިޔާއާއި ޖަލުގައި ބަންދު ކުރުމުން އެންމެ ބޮޑަށް ނާޒިމާއި އާއިލާއަށް އެހީވީ ގާސިމް ކަމަށެވެ.
އެހެން އެކަން އޮތް އިރު، މިއަދު ޕާޓީ ފުޅާވެ މަސައްކަތް އިތުރު ވަމުން ދަނިކޮށް އިސްތިއުފާ ދެއްވުމަކީ އެހާ ރަނގަޅު ކަމެއް ނޫން ކަމަށް، އާރިފް "މިހާރު" ނޫހަށް ދެއްވި އިންޓަވިއުއެއްގައި ވިދާޅުވިއެވެ.
ޖޭޕީއަކީ ކޮންމެ އިންތިޚާބަކާ ގުޅިގެން ފޮޅޭ މަލެއްގެ ގޮތުގައި އޮތް އޮތުން ބަދަލުކޮށް ރައްޔިތުންނަށް ޚިދުމަތް ކުރާ، ރައްޔިތުންގެ ހައްގުގައި ވަކާލާތު ކުރާ ޕާޓީއަކަށް ބަދަލުކުރަން ޖެހޭ ކަމަށް އޭނާ ވިދާޅުވިއެވެ.
ކުރީގެ ސަރުކާރުން ނާޒިމްގެ އިތުރުން ރައީސް ނަޝީދާއި ހޯމް މިނިސްޓަރ އިމްރާނަށް ދެއްވި އަނިޔާއާ ދެކޮޅަށް ގާސިމް ވަކާލާތު ކުރުމުން އެންމެ ފަހުން އެމަނިކުފާނުވެސް ދާން ޖެހުނީ ޖަލަށް ކަމަށް އާރިފް ވިދާޅުވިއެވެ.
އޭރު ޔާމީންގެ ސަރުކާރު ދިފާއު ކުރުމަށް އެންމެ ބޮޑަށް މަސައްކަތް ކުރެއްވި އެއް މެމްބަރު ކަމަށްވާ އާރިފް ވަނީ އެ ސަރުކާރު ބަދަލުކުރަން ގާސިމް އިބްރާހިމް ކުރެއްވި މަސައްކަތް ނުކުރެއްވި ނަމަ މިއަދު އާ ސަރުކާރު އައިސް އަނިޔާ ތަކުން މިންޖުވުމުގެ ފުރުސަތުވެސް ނޯންނާނެ ކަމަށް ވިދާޅުވެފައެވެ.
ޖޭޕީ އިން ބުނެފައިވަނީ ނާޒިމް ވަކިވީ ދެން އޮންނަ ރިޔާސީ އިންތިޚާބުގެ ރިޔާސީ ޓިކެޓު ޕާޓީން ނުލިބޭނެތީ ކަމަށް ބެލެވޭ ކަމަށެވެ.
ނަމަވެސް އަލީ އާރިފް ވިދާޅުވީ ޕާޓީގެ ޕީޖީ ނައިބު ލީޑަރުކަން ވެސް ކުރައްވަމުން އަންނަ ނާޒިމް، ކޮމިޓީ ބައްދަލުވުންތަކަށް ނައިސް ހެދުމާއި މަގުބޫލު އުޒުރެއް ވެސް ދެއްކުމެއް ނެތި ނާންނާތީ އެމަގާމު ދޫކޮށްލަން ޕާޓީން އެދިފައިވެސް ވާނެ ކަމަށެވެ.