ޖުޑިޝަރީ އިސްލާހު ކުރުމުގެ ނަމުގައި ހިންގަނީ އަދުލު އިންސާފުގެ މައްޗަށް އަރައިގަތުން ކަމަށާއި، މިހާރު މިދަނީ ވެރިކަން ވެއްޓެން ކަމަށް ފޭދޫ ދާއިރާގެ ކުރީގެ މެމްބަރު އަދި އެމްޑީޕީގެ ކުރީގެ ނައިބް ރައީސް އަލްހާން ފަހުމީ ވިދާޅުވެއްޖެއެވެ.
ސަންގު ޓީވީގައި ވާހަކަފުޅު ދައްކަވަމުން އަލްހާން ވަނީ ރައީސް ނަޝީދާއި ސަރުކާރަށް ފާޑު ކިޔާފައެވެ. އެގޮތުން ރައީސް ނަޝީދަކީ އިންސާފު އެއްގޮތަކަށްވެސް ދަންނަ ބޭފުޅެއް ނޫންކަމަށާއި، ހައްގުވާ މިންވަރަކީ ރައީސް ނަޝީދު ވިދާޅުވާ މިންވަރުކަމަށެވެ.
"އެމްޑީޕީގެ ހާއްސަކޮށް ރައިސް ނަޝީދަކީ ތިއީ އިންސާފު ދަންނަ ބޭފުޅެއްވެސް ނޫން، ރައީސް ނަޝީދު ބޭނުންފުޅުވާ ގޮތް އެއީ އިންސާފު، ހައްގުވާ މިންވަރަކީ ރައީސް ނަޝީދު ވިދާޅުވާ ވަރު، އަޅުގަނޑު ބަނޑުވެސް ފުރޭނީ ރައީސް ނަޝީދު ވިދާޅުވާ ވަރަކުން އެއީ، އެއީ ރައީސު ނަޝީދު ވިދާޅުވާ އިންސާފަކީ"
އަލްހާން ވިދާޅުވިއެވެ.
އަލްހާން ވިދާޅުވީ މީގެ ކުރިންވެސް ރައީސް ނަޝީދު ކުރައްވާފައި ހުރި ކަންކަން ހުރީ ފެންނަން ކަމަށާއި ފަނޑިޔާރަކު ހައްޔަރު ކުރުމަށް ސިފައިން ފޮނުވިކަން ދިވެހިން ހަނދާން އެބަހުރިކަމަށެވެ.
"ފަނޑިޔާރުންނާއި ވާހަކަ ދައްކައިގެން ޕްރެޝަރކޮށްގެން ނުވަންޏާ ސިފައިން ފޮނުވައިގެން ހައްޔަރު ކުރާ ހިސާބަށްވެސް ދަޔައީ ނޫންތޯ، އަޅުގަނޑުމެން އެޕާޓީ ހިންގަން ތިބި އިރު، މިހާރު މިދަނީ ވެރިކަން ވެއްޓެން، އަނދުލު އިންސާފުގެ މައްޗަށް އަރައިގަނެ ވެރިން ބާރުވެރިކަން ހިންގާ ވެރިން ބޭނުންވާހާ ގޮތަކަށް ހުކުމް ކުރާ ހިސާބަށް ދިޔައީމާ ދެން ވެއްޓޭނީ، ދެން ވެއްޓޭނީ އިތުރު ގޮތެެއް ނުވާނެ"
އަލްހާން ވިދާޅުވީ ފަނޑިޔާރުގެ ހައިލަމްގެ މައްސަލާގައި ރައީސް ނަޝީދަށް މަޑުން ނުހުރެވިގެން ހެނދުނު 8 ޖެހި އިރު ޖުޑިޝަލް ސާވިސް ކަމިޝަނަށް ގޮސް ހައިލަމް އެ ކޮމެޓީއަށް ހާޒިރު ކުރަން އުޅުމުން އެކަމުގައި ފަނޑިޔާރުންނަށް އޮތް ނުފޫޒު ހާމަވާކަމަށެވެ. އަދި މިކަމުން އެމްޑީޕީ އާއި ރައީސް ނަޝީދުގެ ނިޔަތް ސާފުވާ ކަމަށެވެ.