ބަންގްލަދޭޝްގައި މަރުވި ރާއްޖޭގެ މަޝްހޫރު މޮޑެލް ރައުދާ އާތިފް މަރުވެފައިވަނީ އަމިއްލައަށް ކަމަށް ގެއްލުވާލާފައިވާ މީހުންނާއި ގޮތް ނޭނގޭ މަރުތަކުގެ މައްސަލަތައް ބަލާ ރިޔާސީ ކޮމިޝަންއިން ނިންމާފައިވާކަން ހާމަވެއްޖެއެވެ.
މަރު ކޮމިޝަނުން ވަނީ ރައުދާގެ މަރުގެ މައްސަލައިގެ ރިޕޯޓު ރައީސް އިބްރާހިމް މުހައްމަދު ސޯލިހުއަށް އަރުވާފައެވެ.
ބަންގްލަދޭޝްގެ ރާޖްޝާހީގައި ހުންނަ އިސްލާމީ ބޭންކް މެޑިކަލް ކޮލެޖްގައި މެޑިސިން ކިޔަވަމުން ދިޔަ، އުމުރުން 21 އަހަރުގެ ރައުދާގެ މަރުވެފައިވާ ހަށިގަނޑު ފެނުނީ 2017 ވަނަ އަހަރު އޭނާ ކިޔަވަން އުޅުނު ކޮލެޖްގެ ނިދާ ކޮޓަރި ތެރެއިންނެވެ.
ރައުދާގެ މަރުގެ މައްސަލާގައި އޭނާ އާއެކު ކިޔަވަން އުޅުނު ކުއްޖަކަށް ތުހުމަތު ކުރި އެވެ. ނަމަވެސް ބަންގްލަދޭޝްގެ ފުލުހުންގެ ތަހުގީގުން ފާހަގަވީ ރައުދާ މަރުވީ އަމިއްލަ އަށް ދަންޖެހިގެން ކަމަށެވެ. ރައުދާ އަމިއްލަ އަށް މަރުވީ ލޯބިވެރިޔާއާ މައްސަލަ ޖެހިގެން ކަމަށް ބަންގްލަދޭޝްގެ ފުލުހުން ވަނީ ބުނެފައެެވެ.
ރައުދާގެ މަރުގެ ރިޕޯޓު މަރު ކޮމިޝަނުން އެކުލަވާލާފައިވަނީ ބަންގްލަދޭޝްގެ ރަސްމީ ފަރާތްތަކުގެ އެހީތެރިކަމާއިއެކުއެވެ.
ރައުދާގެ މަރުގެ ތުހުމަތު އާއިލާއިން އޭނާގެ ރަހްމަތްތެރިންތަކަށް ތުހުމަތު ކުރި ނަމަވެސް އެކަން ބަންގްލަދޭޝް ފުލުހުން ހޯދާފައިވާ ހެކި ތަކުގައި ވަނީ ދޮގު ކޮށްފައެވެ.