ވެރިކަމަކީ، ކަންތައްތައް ނިންމުމާއި، ކަންތައްތައް ތަންފީޒު ކުރުމަށް ކިޔާ ނަމެކެވެ. ހެޔޮ ވެރިކަމަކީ، ދައުލަތެއްގައި އެކުލެވިގެންވާ ނިޒާމުތަކުގެ ތެރެއިން ރައްޔިތުންނާ ވީހާވެސް ގާތުން، ދައުލަތުގެ ވަސީލަތްތަށް އެންމެ ފުރިހަމަ ގޮތުގައި ބޭނުންކޮށްގެން ކުރެވޭ ވެރިކަމެކެވެ.
ޤައުމެއްގެ ތަރައްޤީގެ ދުވެލި އަވަސް ވެގަންނާނީ އެ ޤައުމުގައި ހެޔޮވެރިކަމެއް އޮވެގެންނެވެ. ވެރިކަމެއް "ހެޔޮ" ވެރިކަމެއްގެ ގޮތުގައި ބެލެވޭނީ ބައެއް ކަހަލަ އަސާސްތަކެއް ފުރިހަމަ ވެގެންނެވެ.
ހެޔޮ ވެރިކަމެއް ރައްޔިތުންނާއި ހަމަޔަށް ފޯރު ކޮށްދެވޭނީ ފުރިހަމައަށް މި އަސާސްތަކަށް ބޯލަނބައިގެންނެވެ. ދުނިޔޭގައި އުފާވެރި މުޖުތަމަޢެއް ދިރި އުޅޭނީ އަބަދުވެސް މިދެންނެވި ހެޔޮވެރިކަމުގެ އުސޫލުތަކަށް ތަބާވާ ޤައުމުތަކުގައެވެ.
ޤާނޫނީ ހައިސިއްޔަތު ލިބިގެން މެނުވީ އެއްވެސް ވެރިކަމެއް ހެޔޮވެރިކަމަކަށް ނުވާނެއެވެ. އެހެނީ ޤާނޫނީ ހައިސިއްޔަތެއް ލިބޭނީ ހުރިހާ ރައްޔިތުންގެ ބައިވެރިވުން އެ ވެރި ކަމެއްގައި އެކުލެވިގެންނެވެ. އަދި ގޮތް ނިންމުމުގައި، ރައްޔިތުންގެ ބައިވެރިވުން ސީދާ ގޮތުންނާއި ނުސީދާ ގޮތުން މަންދޫބުންތަކެއް މެދުވެރިކޮށް ހިމެނިގެންނެވެ.
އަމާޒެއް ނެތި ދަތުރު ކުރާ އޮޑިއެއް ފަދައިން ސަރުކާރެއް ހިންގީމަވާނީ ކިހިނެތް ހެއްޔެވެ؟ އަޅުގަނޑުމެން މިއެދޭ ފަދަ ހެޔޮވެރިކަމެއް ކުރާއިރު ތަރައްޤީގެ ދިގު ރާސްތާ ޕްލޭނެއް ކުރެވިފައި އޮންނަންވާނެއެވެ. އަދި އިންސާނީ ވަސީލަތްތަށް ތަރައްޤީކުރުމަށް އިސްކަންދޭންވާނެއެވެ. އެ ސަރަހައްދެއްގެ ސަޤާފަތާއި އާދަކާދަތަކަށް ބަލައި ވަކި އަމާޒަކަށް ވާސިލުވުމަށް ހާއްސަ ލަނޑުދަނޑިތަކެއް ދުރާލާ ރާވަން ޖެހެއެވެ.
ސަރުކާރުން ކުރަނީ ކޮންކަހަލަ ވެރިކަމެއްތޯ ވަޒަން ކުރެވިދާނެ އެންމެ ފަސޭހަ އެއްގޮތަކީ މަސްޢޫލިއްޔަތު އަދާ ކުރާ މިންވަރު ބެލުމެވެ.
މިގޮތުން ބައެއް ކަންތައްތަކުގެ ތެރޭގައި، ކަމާބެހޭ ވުޒާރާތަކުން، ރައްޔިތުންނަށް ހިދުމަތްތަށް ދޭގޮތް ބެލިދާނެއެވެ. އަދި ދެވޭ ހިދުމަތަކީ ތަފާތު ކުރުމެއްނެތި ދަޢުލަތުގެ ވަސީލަތްތަށް އެންމެ ފުރިހަމަ ގޮތުގައި ބޭނުންކޮށްގެން ދެވޭ ޙިދުމަތް ތަކަށްވެސް ވާންވާނެއެވެ.
އެވަގުތު އޮންނަ ވެރިކަމަކަށް ރައްޔިތުން އިތުބާރު ކުރާނީ ވެރިން ޖަވާބުދާރީ ވެގެންނެވެ. އަދި ދެ ފުށް ފެންނަ ސިޔާސަތުތަކެއް ގެންގުޅެގެންނެވެ.
އިނގިރޭސި ބަހުން މި ކިޔާ "ޓްރާންސްޕޭރެންސީ" އަދި "އެކައުންޓިބިލިޓީ" ހުރެގެންނެވެ. ސަރުކާރުތެރޭގައި ގޮތް ނިންމާ ފަރާތްތަކަކީ ރައްޔިތުންނަށް ޖަވާބުދާރީ ވާންޖެހޭ ބައެކެވެ.
އަދި ސަރުކާރު ތެރޭގައި ހިންގޭ އެންމެހާ ކަންތައްތަކަކީ ދެފުއް ފެންނަ ގޮތަަށް ހިންގޭ ކަންކަމަށް ވާންވާނެއެވެ. އަދި ކުރެވޭ އެންމެހާ މުޢާމަލާތު ތަކުގެ މަޢުލޫމާތު ކޮންމެ މީހަކު ބަލަން ބޭނުން ވިޔަސް ލިބެން ހުރުމަކީ ހެޔޮވެރިކަމަކަށް ވާގިދޭ ކަމެކެވެ.
މިގޮތަށް އަމަލު ކުރުމުން، ވެރިންނާއި، ރައްޔިތުންނާއި ދެމެދު އޮންނަ ގުޅުން ވަރަށް ރަނގަޅުވެއެވެ. އަދި ނަޒާހާތްތެރިކަމާއި އެކު މަސައްކަތް ކުރުމަށް ވެވޭ އިތުރު ބާރަކަށް ވެގެންދާނެއެވެ.
ހެޔޮވެރިކަމެއްގައި ހުރިހާ ރައްޔިތުންމެ ހަމަހަމަ ވާންޖެހޭނެއެވެ. މީގެ އިތުރުން އެބައިމީހުންގެ އާއްމު ޙާލަތު ރަނގަޅު ކުރުމަށް އެއްވަރެއްގެ ހަމަހަމަ ފުރުސަތެއް ލިބެންވާނެއެވެ. އަދި ހަމަ އެހެންމެ ޤާނޫނުގެ ވެރިކަން ދަމަހައްޓާ އަދި ޤާނޫނަކީ ހުރިހާ އެންމެންނަށްވެސް އެއްހަމައެއްގައި ބާރު ފޯރުވޭ އެންމެންގެ މައްޗަށް ހިނގާ އެއްޗަކަށް ވާންވާނެއެވެ.