ރޯވިން އެސޯސިއޭޝަން އޮފް މޯލްޑިވްސްގެ އެދުމަކަށް އައްޑޫގެ ޑެޕިއުޓީ މޭޔަރ މުހައްމަދު ޔަސްރިފް ލަންޑަނަށް ފުރައިފިއެވެ.
ޔަސްރިފް ލަންޑަނަށް ވަޑައިގެންފައިވަނީ ވޯލްޑް ރޯވިން އިން އިންތިޒާމްކޮށްގެން މިމަހުގެ 19 އިން 23 އަށް އިނގިރޭސިވިލާތުގެ ލަންޑަނުގައި ބާއްވާ ދުނިޔޭގެ ހުރިހާ ފެޑެރޭޝަންގެ މީޓިންގައި އައްޑޫ ކައުންސިލްގެ ސިވިލް ސާވިސް މުވައްޒަފަކު ބައިވެރިކޮށްދިނުމަށް އެދި ކައުންސިލަށް ރޯވިން އެސޯސިއޭޝަން އޮފް މޯލްޑިވްސްއިން ފޮނުވި ސިޓީ އަކާއި ގުޅިގެން ކައުންސިލްގެ މަޝްވަރާއަށް ފަހު ކައުންސިލްގެ ބައްދަލުވުމުގައި ބައިވެރި 5 މެމްބަރުންގެ ތެރެއިން 3 މެމްބަރެއްގެ ވޯޓުންނެވެ. ނުފެންނަ ކަމަށް 2 މެމްބަރަކު ވޯޓު ދެއްވާފައިވާ އިރު ވޯޓުގައި ބައިވެރި ނުވާ އެއް މެމްބަރަކު ހުރިކަމަށް ކައުންސިލްގެ ނިންމުމުގައި ފާހަގަކޮށްފައިވެއެވެ.
އައްޑޫ ކައުންސިލުން ވަނީ ޑެޕިއުޓީ މޭޔަރ ލަންޑަނަށް ދިއުމުގެ ދެކޮޅު ޓިކެޓާއި ހުރުމާއި ކެއުމުގެ ހަރަދުގެ ގޮތުގައި -/36،528 ރުފިޔާ، ޖަމްއިއްޔާ ޖަމާއަތްތަކުން ބާއްވާ އެކިއެކި ޙަރަކާތްތަކަށް ދޭ އެހީ 228 999 ކޯޑް އިން ހަމަޖެއްސުމަށް ފާސްކޮށްފައެވެ.
މި މައްސަލަ ކައުންސިލް ބައްދަލުވުމަށް ހުށަހެޅުއްވީ މަރަދޫ ދާއިރާގެ ކައުންސިލަރު ފައިޞަލް އިބްރާޙިމްއެވެ. ތާއިދު ކުރެއްވީ ހިތަދޫ މެދު ދާއިރާގެ ކައުންސިލަރު ޖަމްޝީދާ މުހައްމަދުއެވެ.
ޑެޕިއުޓީ މޭޔަރުގެ ދަތުރާއި ގުޅޭގޮތުން އައްޑޫގެ މޭޔަރ އަބްދުﷲ ސޯދިގު (ސޯބެ) އައްޑޫލައިވްއަށް ވިދާޅުވީ ލަންޑަނުގައި ކުރިއަށްދާ މީޓިންއަށް ޑެޕިއުޓީ މޭޔަރ ފޮނުވީ އައްޑޫގައި އިންޓަނޭޝަނަލް ކުޅިވަރު މުބާރާތްތައް ބޭއްވުމަށް ކައުންސިލުން އަބަދުވެެސް ބޭނުންވާތީ މި ބައްދަލުވުމުގެ ތެރެއިން އެފަދަ ފުރުސަތެއް ލިބިދާނެތީކަމަށެވެ.
"އެނގިވަޑައިގަންނަވާނެ ރޯވިން އަކީ އައްޑޫ ކައުންސިލްގެ ވަރަށް ބޮޑު އެހީތެރިކަމާއި އެކު ކުރިއަށްދާ ކުޅިވަރެއް، ކައުންސިލުން މީގެ ކުރިން ދެ އަހަރެއްގެ ބަޖެޓުގައި ހިމަނައިގެންވެސް ރޯވިންއަށް އެެހީތެރިވިން، ބޭނުމަކީ އައްޑޫގައި ރޯވިން ކުޅިވަރެއްގެ ގޮތުގައި ކުރިއަރުވަން"
ސޯބެ ވިދާޅުވިއެވެ.
ސޯބެ ވިދާޅުވީ މީގެ ކުރިންވެސް ރޯވިންއިން ބޭރަށް ކުރާ ދަތުރުތަކުގައި ކައުންސިލަރުން ބައިވެރިވެފައިވާ ކަމަށާއި މިކަމަކީ އަލަށް ކުރާ ކަމެއް ނޫންކަމަށެވެ.
އައްޑޫ ޕްރޮމޯޓު ކުރުމަށާއި، އައްޑޫގައި އިންޓަނޭޝަނަލް މުބާރާތެއް ބޭއްވޭތޯ ބެލުމަށް ޑެޕިއުޓީ މޭޔަރަ ކުރައްވާ ދަތުރުތަކުގެ އެއްވެސް ތަފްސީލެއް އަދި އެ ދަތުރުގެ އެއްވެސް ކަވަރޭޖެއް އައްޑޫ ސިޓީ ކައުންސިލުން ހާމަކޮށްފައި ނުވެއެވެ.
ލަންޑަނުގައި ބާއްވާ ވޯލްޑް ރޯވިން މީޓިން އާއި ގުޅޭ ގޮތުން ރޯވިން އެސޯސިއޭޝަން އޮފް މޯލްޑިވްސްގެ ރައީސް އަހުމަދު ހަބީބު ވިދާޅުވީ މި ދަތުރުގައި ކައުންސިލްގެ ބައިވެރިވުން ހޯދުމަށް ސިޓީ ހުށަހެޅި އެންމެ ބޮޑު ބޭނުމަކީ ރޯވިން އެސޯސިއޭޝަނަށް ސަރުކާރުގެ ހާއްސަކޮށް ކައުންސިލްގެ ބެކިން އޮތްކަން ދެއްކުން ކަމަށެވެ. އަދި މި ދަތުރުގައި ކައުންސިލަރުން މީހަކު ބައިވެރި ކުރިއަސް ރޯވިން އެސޯސިއޭޝަނުން ލަންޑަނަށްދާ ފަރާތަކަަށް ކައުންސިލުން އެއްވެސް ހޭދައެއް ނުކުރާނެކަމަށެވެ.
ރޯވިން އިން އަންނަނީ ބޭރުގައި ބާއްވާ ބައެއް މުބާރާތްތަކުގައި ބައިވެރިވުމުގެ އިތުރުން ސްކޫލް ކުދިންނަށް ރޯވިންއަށް އަހުލުވެރިކުރުމުގެ ގޮތުން މުބާރާތްތަކާއި ޓްރެއިނިން ބާއްވަމުންނެވެ.