ދީނީ ހައްދު ފަހަނަޅާފައިވާ ޖަމާއަތްތަކެއް ރާއްޖޭގައި ހަރަކާތްތެރިވެ، ޓެރަރިސްޓު ޖަމާއަތްތަކާއި ބޮޑެތި ކުށްތަކަށް މަގުފަހިކުރަމުންދާ ކަމަށް ބުނެ އަައްޑޫ ސިޓީ ކައުންސިލްގެ ހަތަރު ކައުންސިލަރަކު ސޮއިކޮށް ނެރުނު ގަރާރާއެކު ކައުންސިލަށް ފާޑުކިޔުންތަކެއް އަމާޒުވެއްޖެއެވެ.
ޑެޕިއުޓީ މޭޔަރ ޔަސްރިފާއި ހިތަދޫ މެދު ދާއިރާ ކައުންސިލަރ ޖަމްޝީދާ މުހައްމަދު އަދި ހުޅުދޫ ކައުންސިލަރ ޝުކުރީގެ ސޮޔެއް ގަރާރުގައި ނެތެވެ. ޔަސްރިފާއި ޖަމްޝީދާ މިވަގުތު އައްޑޫގައި ނޫޅުއްވާތީ ސޮއިނުކުރައްވާއިރު ޝުކުރީ ވަނީ ޖަލްސާއަށް ސަލާމް ބުނެފައެވެ.
މިގަރާރުގައި ދީނީ ހަރުކަށި ފިކުރު ގެންގުޅޭ ފަރާތްތަކާއި ދެކޮޅަށް އެޅެން ހުރި ފިޔަވަޅުތައް އެޅުމަށް ގޮވާލާފައިވެއެވެ.
ބައެއް އާންމުންގެ ފާޑުކިޔުންތައް މި ގަރާރަށް އަމާޒުވީ، ރަސޫލާއަށް ފުރައްސާރަކޮށް އެމްޑީއެން ރިޕޯޓޫ އެކުލަވާލުމުން އެކަން ކުށްވެރިކޮށް ކައުންސިލުން ބަޔާނެއް ނެރެފައިނުވާތީއެވެ. ރާއްޖޭގެ އެކި ކަންކޮޅުތަކުގެ ކައުންސިލްތަކުން އެރިޕޯޓު ކުށްވެރިކޮށް ބަޔާން ނެރުނު އިރު އައްޑޫ ސިޓީ ކައުންސިލުން ބަޔާނެއް ނެރެފައިވަނީ ހުޅުދޫ އަދި މީދޫ ކައުންސިލަރ ޝުކުރީ އާއި ހިޔާޒު، ވަކިންނެވެ.
ހަނގުރާމަވެރި ޖަމާއަތްތަކަށް ވާގިވެރިވާ ކަމަށް ބުނެ ޖަމިއްޔަތުއް ސަލަފާ ދެކޮޅަށް ފިޔަވަޅު އަޅަން އެމްޑީޕީން ވަނީ ގޮވާލާފައެވެ. މިކަން ހާމަވެފައިވަނީ ކުރީގެ މަޖިލިސް މެމްބަރު އަދި ދީނީ އިލްމުވެރިޔާ، ޑރ. އަފްރާޝީމް އަލީ އަވަހާރަކޮށްލުމާއި ސަލަފާ ގުޅުން ހުރި ކަމަށް މަރު ކޮމިޝަންގެ ރިޕޯޓުން ހެކި ތަކާ އެކު ޝާއިއު ކުރުމުންނެވެ.