މިސަރުކާރު އައި ފަހުން މިހާރު ރާއްޖޭގައި އިސްލާމް ދީނަށް ފުރައްސާރަ ކުރާ މިންވަރު އިންތިހާއަށް އިތުރުވެއްޖެ ކަމަށް ފަރެސްމާތޮޑާ ދާއިރާގެ މެމްބަރު ހުސެން މުހައްމަދު ލަތީފް ވިދާޅުވެއްޖެއެވެ.
ރިޔާސީ އިންތިޚާބުން ޔާމީން ބަލިވުމާއެކު ޕީޕީއެމް ދޫކޮށް ޖުމުހޫރީ ޕާޓީއަށް ބަދަލުވި ހުސެން ވަނީ ނިމިގެން ދިޔަ މަޖިލިސް އިންތިޚާބުގައި ވާދަކޮށް ގޮނޑި ކާމިޔާބުކޮށްފައެވެ. އޭނާ އަލުން ޕީޕީއެމާ ގުޅިފައިވާއިރު ފޯމު ޕާޓީގެ ރައީސް ޔާމީނަށް ވަނީ އަރުވާފައެވެ.
"ހިބަރު ވަދު" ގެ ނަމުގައި ޕީޕީއެމުން ބާއްވަމުންދާ ޖަލްސާގައި ވާޙަކަ ދައްކަވަމުން ހުސެން ވިދާޅުވީ ދީނަށް ފުރައްސާރަ ކުރުމާއި ދީނާ ދެކޮޅު ގިނަ ކަންތައްތަކެއް މިހާރު ފެންނަމުންދާ ކަމަށެވެ.
އިސްލާމް ދީނާ ދެކޮޅަށް ހުޅަނގުގެ ބޮޑެތި ބާރުތަކުން އަބަދުވެސް މަސައްކަތް ކުރާ ކަމަށާއި، އެމީހުންގެ އަމާޒަކީ އިސްލާމީ ކުދި ގައުމުތައް ބިކަ ކޮށްލުން ކަމަށް އޭނާ ވިދާޅުވިއެވެ. ތާރީޚުގައި ބޭރުގެ މީހުން ދިވެހި ރާއްޖެއާ ތޮޅެނީ އަބަދުވެސް ރާއްޖޭގެ ބަޔަކާ ގުޅިގެން ކަމަށް އޭނާ ވިދާޅުވިއެވެ.
އޭނާ ވަނީ މިޖަލްސާގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ނުސީދާ ގޮތުން ވަރަށް ބޮޑަށް ފާޑުވިދާޅުވެފައެވެ.
އެމަނިކުފާނު މަޖިލީހުގައި އިންނަވައިގެން ކުރައްވާ ކަންތައްތައް ދިވެހި ރައްޔިތުންނަށް "އޯކޭ" ނުވާނެ ކަމަށާއި މިޖަލްސާއިން ވެސް އެކަން ފެނިގެންދާ ކަމަށް ވިދާޅުވިއެވެ.