އިއްޔެ އެމްޑީޕީން ބޭއްވި އެޕާޓީގެ އެތެރޭގެ އިންތިޚާބުގައި ވޯޓުލާން އައި މެމްބަރުންގެ އަދަދު މަދުވުމުން ފާޑުކިޔާތީ އެމްޑީޕީގެ ރައީސް މުހައްމަދު ނަޝީދު އިދިކޮޅަށް ރައްދު ދެއްވައިފިއެވެ.
އިއްޔެގެ އިންތިޚާބުގައި ވޯޓުލީ 23،000 އަށްވުރެ ގިނަ މެމްބަރުންގެ ވޯޓުން އަނެއްކާވެސް ޕާޓީގެ ރައީސަކަށް ހޮވުނު ކުރީގެ ރައީސް އަދި މަޖިލީހުގެ ރައީސް މިއަދު ވަނީ، ފާޑުކިޔާ އިދިކޮޅު ފަރާތްތަކަށް އެތެރޭގެ އިންތިޚާބެއްގައި 200 މީހުންވެސް ވޯޓުލާން ނެރެވޭނެތޯ ސުވާލުކޮށް ރައްދު ދެއްވާފައެވެ.
ރައީސް ނަޝީދު ވިދާޅުވީ ޕާޓީ އެތެރޭގެ އިންތިޚާބުތަކުގައި އަބަދުވެސް ވޯޓުލާ މެމްބަރުން މަދުވާނެ ކަމަށެވެ. ތަރައްގީ ވެފައިވާ ގައުމުތަކުގައި ވެސް މިފަދަ އިންތިޚާބުގައި ބައިވެރިވަނީ ހަތް ޕަސެންޓު އާބާދީއެއް ކަމަށާއި އެމްޑީޕީގައި އިންތިޚާބުތަކުގައި މޮޅުކުރުމަށް އަބަދުވެސް 25،000 މެމްބަރުން ބަދަލެއް ނެތި ހަރަކާތްތެރިވަމުން އަންނަ ކަން އެމަނިކުފާނު ފާހަގަކުރެއްވިއެވެ.
އިލެކްޝަންސް ކޮމިޝަނުގައި 54،000 މެމްބަރުން އެމްޑީޕީގައި ތިބިކަމަށް ލިސްޓުކުރެވިފައިވާއިރު އެމްޑީޕީން ވަނީ 87،000 މީހުންނަށް އިއްޔެ ބޭއްވުނު އިންތިޚާބުގައި ވޯޓު ހައްގު ކަމަށެވެ. އިންތިޚާބުގައި ވޯޓުލާފައިވަނީ 23،000 މެމްބަރުންނެވެ.
އިއްޔެ ބޭއްވި އިންތިޚާބު ކާމިޔާބުކުރެއްވީ މިހާރުވެސް ޕާޓީގެ ރައީސް އަދި ނައިބު ރައީސްކަން ކުރައްވަމުން ގެންދަވާ ރައީސް ނަޝީދާއި ރައީސް އޮފީހުގެ މިނިސްޓަރ މުހައްމަދު ޝިފާޒެވެ.