އައްޑޫ ސިޓީގެ މޭޔަރުގެ މަގާމަށް ގެނައުމަށް ކުރީގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު ރަނގަޅު ކަމަށް ކުރީގެ ޑެޕިއުޓީ މޭޔަރ އަބްދުﷲ ތޮއްޔިބް(ޓޮމް) ވިދާޅުވެއްޖެއެވެ.
ޓޮމް މިހެން ވިދާޅުވެފައިވަނީ އަންނަ އަހަރު އެޕްރިލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި ނިޒާރު ވާދަކުރަން އުޅޭ ކަމުގެ އަޑުތައް ގަދަވެފައިވަނިކޮށެވެ.
އައްޑޫ ސިޓީ ކައުންސިލްގެ މިހާރު ހިނގަމުންދާ ދައުރުގައި އެމްޑީޕީން ހޮވި ހަތް ކައުންސިލަރުންގެ މަސައްކަތާ މެދު ރައްޔިތުންގެ ފާޑުކިޔުންތައް އިންތިހާއަށް ގިނަ ވެފައިވާ މިދަނޑިވަޅުގައި ގިނަ ބަޔަކު ކައުންސިލް އެއްކޮށް ބަދަލުކުރަން ތާއީދުކޮށް ސޯޝަލް މީޑިޔާގައި ވާހަކަ ދައްކާފައިވެއެވެ.
ރަސްމީކޮށް ކައުންސިލް އިންތިޚާބަށް ވާދަކުރަން ނިންމާފައިވާކަން ނިޒާރު އަދި އިއުލާން ކޮށްފައެއް ނުވެއެވެ. ނަމަވެސް އިތުބާރު ހުރި މަސްދަރަކުން، ނިޒާރު ކައުންސިލަށް ވާދަކުރަން ނިންމާފައިވާކަން "އައްޑޫލައިވް" އަށް ވަނީ ކަށަވަރުވެފައެވެ.