އައްޑޫގެ މަރުކަޒީ އިންޖީނުގޭގެ ދެ ޖަނަރޭޓަރަކަށް ދިމާވި މައްސަލަ އަކާއި ގުޅިގެން އައްޑޫގެ ގުޅިފައިވާ ރަށްރަށުން ދޭތެރެ ދޭތެރެއިން ކަރަންޓްގެ ހިދްމަތް މެދު ކެދެމުންދާ މައްސަލަ ކުރިއަށްއޮތް ދެ ދުވަހެއްގެ ތެރޭގައި އެއްކޮށް ހައްލު ކުރެވޭވަރު ވާނެކަމަށް ސަދަން ޔޫޓިލިޓީސް (އެސްޔޫއެލް) އިން ބުނެފިއެވެ.
އެސްޔޫއެލް ހިންގުމާއި ހަވާލުވެ ހުންނެވި އަބްދުﷲ ޒުހައިރު (އަބްހަރީ) ވިދާޅުވީ އިންޖީނުގޭގެ އެއް އިންޖީނަށް މައްސަލަތަކެއް ދިމާވެ އެ އިންޖީނު މަރާމާތު ކުރަމުން ދަނިކޮށް ދެވަނަ އިންޖީނު ހަލާކު ވުމާއި ގުޅިގެން މިހާރު ހިންގަމުންދާ ޖަނަރޭޓަރު ތަކަށް ލޯޑު ބޮޑުވެ ދޭތެރެ ދޭތެރެއިން ކަރަންޓްގެ ޚިދްމަތް ކަޑަން މަޖްބޫރުވަނީ ކަމަށެވެ.
ޒުހެއިރު ވިދާޅުވީ މައްސަލަ ޖެހިގެން މަރާމާތު ކުރަމުންދަނީ 750 ކޭވީގެ ޖަނަރޭޓަރަކާއި 1 މެގަވޯޓްގެ ޖަނަރޭޓަރެއް ކަމަށެވެ. އަދި އެއްޖަނަރޭޓަރު މަރާމާތު މަސައްކަތް ނިމި މިއަދު ބޭނުންކުރަން ފެށޭނެކަމަށާއި އެހެން ކަމުން ކަރަންޓް ކެނޑޭމައްސަލައަށް މިއަދު ކޮންމެވެސް ވަރެއްގެ ހައްލެއް ލިބޭނެކަމަށް އެސްޔޫއެލް އިން މައުލޫމާތުދެއްވިއެވެ.
ޒުހައިރު ވިދާޅުވީ ކަރަންޓަށް ފުރިހަމަ ހައްލެއް ލިބެން އޮތީ ދެ ވަނަ ޖަނަރޭޓަރުވެސް މަރާމާތުކުރެވި ބޭނުން ކުރަން ފެށިގެންނެވެ. އެގޮތުން ކަރަންޓަށް ފުރިހަމަ ހައްލެއް ލިބެން އަދި ދެ ދުވަސް ނަގާނެކަމަށް އޭނާ ބުންޏެވެ. އަދި މިކަމުގައި ރައްޔިތުންގެ ވަރަށް ބޮޑު އެއްބާރު ލުމެއް ބޭނުންވާކަމަށް ވެސް އޭނާ ވިދާޅުވިއެވެ.
އައްޑޫގެ މައި އިންޖީނުގޭގެ ބޭނުންކުރަމުންދާ 6 ޖަނަރޭޓަރުގެ ތެރެއިން 2 ޖަނަރޭޓަރު ހަލާކުވެ ގުޅިފައިވާ ރަށްތަކުގެ އެކި
ސަރަހައްދުތަކުން ދޭތެރެ ދޭތެރެއިން ކަރަންޓް ކަނޑަމުންދާއިރު ރެއިން ފެށިގެން ކަރަންޓް ކަނޑާލެވޭ ހިސާބު މަދުވާނެކަމަށްވެސް ޒުހައިރު ވިދާޅުވިއެވެ.
އެސްޔޫއެލް އިން ވަނީ ހެނދުނު 7 ން ފެށިގެން އިރު އޮއްސި 5 ކަށް، އަދި ރޭގަނޑު 7 ން ފެށިގެން 11 އާއި ދެމެދު ބޭނުންކުރާ ކަރަންޓް ވީހާވެސް މަދުކުރުމަށް އިލްތިމާސް ކޮށްފައިއެވެ.
އައްޑޫ ސިޓީ ކައުންސިލުން ބުނީ ކަރަންޓްގެ ޚިދަމަތް ދޭތެރެ ދޭތެރެއިން ކެޑުމުގެ ސަބަބުން އާއްމުން ބޭނުން ކުރާ ތަފާތު އިލެކްޓްރޯނިކް ސާމާން ހަލާކު ވަމުންދާކަމުގެ ޝަކުވާ ލިބިފައިވާ ކަމަށާއި އެކަމާއި ގުޅިގެން ކަރަންޓް ކަޑަމުންދާނެ ސަރަހައްދުތައް ބަޔާންކޮސް ދިނުމަށް އެސްޔޫއެލް އިން އެދިފައިވާ ކަމަށެވެ.
އެސްޔޫއެލް އިން ބުނީ އެފަދަ ބަޔާނެއް ނުނެރެވިގެން އުޅެނީ ކަރަންޓް ލޯޑު ބޮޑުވާ ފަހަރު އެކި ސަރަަހައްދުތަކުން އަމިއްލައަށް ކަރަންޓް ކެޑޭތީ ވަކި ސަރަހައްދު ތަކެއް ދަންނަވަން އުނދަގޫކަމަކަށްވާތީ ކަމަށެވެ.