ރާއްޖޭގައި ހަރަކާތްތެރިވާ އެންމެ ބޮޑު އިންޓަނޭޝަނަލް އެއާލައިން، ސްރީ ލަންކަން އިން އައްޑޫ ގަމަށް ދަތުރު ފެށިތާ ތިން އަހަރު ފާހަގަކުރުމުގެ މުނާސަބަތުގައި ހިލޭ މެޑިކަލް ކޭމްޕެއް އައްޑޫގައި ބޭއްވުމަށް އެއާލައިނުން ނިންމައިފިއެވެ.
މީގެ ތިން އަހަރު ކުރިން ޑިސެމްބަރު 2016 ގައި އައްޑޫއަށް ސްރީ ލަންކަންގެ ފުރަތަމަ ފްލައިޓު ޖެއްސިއިރު އެ އެއާލައިނު ވެގެން ގޮސްފައިވަނީ މިއަދާ ހަމައަށް ވެސް އައްޑޫގައި، ހަފްތާއަކު ތިން ފްލައިޓު ޖައްސާ ހަމައެކަނި ބައިނަލްއަގުވާމީ އެއާލައިނަށެވެ.
އަހަރީ ދުވަސް ފާހަގަކުރުމަށް ކައުވެރީ ހޮސްޕިޓަލްގެ ސީނިއާ ޑޮކްޓަރުންގެ ޓީމެއް، މިމަހުގެ 28 ވަނަ ދުވަހުން ފެށިގެން ޑިސެމްބަރު އެކަކާ ހަމައަށް އައްޑޫގައި ހަރަކާތްތެރިވާނެއެވެ. ޑޮކްޓަރުންގެ ޓީމުގައި ނިއުރޮލޮޖިސްޓެއްގެ އިތުރުން ކާޑިއޮލޮޖިސްޓެއްގެ އިތުރުން ނޭވާލާ ނިޒާމުގެ މައްސަލަތަކަށް ޚާއްސަ ޑޮކްޓަރަކާއި ހަކުރު ބައްޔާ ބެހޭ ޑޮކްޓަރެއްގެ އިތުރުން ޑައިޓީޝަން އެއްވެސް ހިމެނެއެވެ.
މެޑިކަލް ޓީމުގެ އަމާޒަކީ އައްޑޫގެ އިތުރުން ކައިރި އަތޮޅުތަކުގައި ތިބި ރައްޔިތުންނަށް ވެސް ހިލޭ ސިއްޚީ ޚިދުމަތެއް ފޯރުކޮށްދިނުން ކަމުގައި ސްރީލަންކަން އިން ބުނެފައިވެއެވެ.
ހަތަރު ދުވަހަށް ބާއްވާ މިކޭމްޕު އޮންނާނީ ހިތަދޫ ރީޖަނަލް ހޮސްޕިޓަލުގައެވެ. ސްރީ ލަންކަން އެއާލައިނާއެކު މިކޭމްޕު އިންތިޒާމްކުރުމުގެ މަސައްކަތް ކުރަމުންދާނީ އެއާލައިނުގެ ރާއްޖޭގެ ރަސްމީ އޭޖެންޓު އޭސް އޭވިއޭޝަނުންނެވެ.