ރާއްޖޭގެ މަޝްހޫރު ވިޔަފާރި ކުންފުންޏެއް ކަމަށްވާ ގްލޯބަލް ލިންކްސްގެ ގިނަ އަދަދެއްގެ ފައިސާތަކަކަށް ޚިޔާނާތްތެރިވިކަމުގެ ދައުވާ އެ ކުންފުނީގެ ކުރީގެ މުވައްޒަފެއްގެ މައްޗަށް ދައުލަތުން ކްރިމިނަލް އުފުލައިފި އެވެ.
އެ ދައުވާ އުފުލާފައި ވަނީ ކުޑަ ކުއްޖަކާ އެކު އެއް ޖިންސުން ގުޅުން ހިންގި މައްސަލައެއް ސާބިތުވެ، މިހާރު ވެސް ޖަލު ހުކުމެއް ތަންފީޒު ކުރަމުން އަންނަ ސ. މީދޫ ސީސަންވާދީ، މުހައްމަދު މުއާޒުގެ މައްޗަށެވެ.
އޭނާގެ މައްޗަށް ކުރާ ދައުވާގައި ވަނީ އޭނާ އެ ކުންފުނީގެ އޮފީސް އެސިސްޓެންޓެއްގެ ގޮތުގައި ހުރެ މިދިޔަ އޮކްޓޫބަރު މަހުގެ 17 ވަނަ ދުވަހު އެ ކުންފުނިން މޮރިޝަސް ކޮމާޝަލް ބޭންކަށް ޖަމާކުރަން އޭނާ އަތަށް ދިން 104،095ރ. އަށް އޭނާ ޚިޔާނާތްތެރިވެފައިވާ ކަމަށެވެ.
އެ މައްސަލައިގެ މިއަދުގެ އަޑު އެހުމުގައި ވަނީ އެ ފައިސާތައް ގެއެއްގެ ސިޑި ގޮޅި ތެރޭގައި ހުއްޓާ މުއާޒު ފުލުހުންނަށް ދެއްކި ކަމަށް ބުނާ ފުލުހެއްގެ ހެކިބަސް ނަގައިފަ އެވެ.
އެ ފުލުސް މީހާ ބުނީ އެ ފައިސާތައް މުއާޒު ފުލުހުންނަށް ދެއްކި ކަމަށާއި އޭރު އޭގެ ތެރެއިން ބައެއް ފައިސާ މަދު ކަމަށެވެ. އަދި ދެން ހުރި ފައިސާތައް ހުރީ މުއާޒު ހުޅުމާލޭގައި އުޅޭ އެޕާޓްމެންޓުގައި ކަމަށް ވެސް އެ ފުލުސް މީހާ ބުންޏެވެ.
ޖަލު ހެދުމުގައި ކޯޓަށް ހާޒިރުކޮށްފައި އިން މުއާޒު ބުނީ އެ ފައިސާތައް އެގޮތަށް ބެހެއްޓީ އަނެއް ދުވަހު ހެނދުނު އޮފީހާ ހަވާލު ކުރުމަށް ކަމަށެވެ.
ނަމަވެސް މައްސަލަ ބައްލަވާ ގާޒީ އަބްދުﷲ ދީދީ ވިދާޅުވީ ކުރީ ދުވަހުގެ ޝަރީއަތުގެ މަޖިލީހުގައި މުއާޒު ބުނެފައިވަނީ އެހެން ގޮތަކަށް ކަމަށެވެ. އެގޮތުން އެ ފައިސާ ހަވާލުކުރީ ޝިފާޒް ނަމަކަށް ކިޔާ މީހަކާ ކަމަށް މުއާޒު ބުނެފައިވާ ކަމަށް ގާޒީ ވިދާޅުވި އެވެ. އަދި އެހާ ފައިސާތަކެއް ގެއެއްގެ ސިޑި ދަށުގައި ރައްކާކުރަން ބަހައްޓަފާނެ ކަމަށް ގަބޫލު ނުކުރެވޭ ކަމަށް ގާޒީ ވިދާޅުވި އެވެ. އަދި ޝަރީއަތުގައި ދޮގު ހަދާނަމަ އަދަބު ބޮޑު ކުރައްވާނެ ކަމުގެ އިންޒާރު ވެސް މުއާޒަށް ގާޒީ އަބްދުﷲ ދީދީ ދެއްވި އެވެ.
މުއާޒު ބުނީ އެ ފައިސާތައް އެތަނުގައި ބެހެއްޓި ކަމަށް އޭނާ އެއްބަސްވާ ކަމަށެވެ. އަދި އޭނާއަކީ ވެސް ދެ ކުދިން ތިބޭ މީހަކަށްވުމުން ވީހާ ވެސް ލުއި ގޮތަކަށް މައްސަލަ ވީހާ ވެސް އަވަހަށް ނިންމައިދިނުމަށް މުއާޒު އެދުނެވެ. އަދި އެ ކުންފުނީގެ ވެރިމީހާ ވެސް އޭނާ އަށް ވަރަށް ރަނގަޅު ކަމަށް މުއާޒު ބުންޏެވެ.
ދައުލަތުން އިތުރު ހެކިވެރިއަކު ހާޒިރުކުރަން އެދިފައިވާތީ ދެން އޮންނަ އަޑުއެހުމުގައި އޭނާ ހާޒިރު ކުރައްވާނެ ކަމަށް ގާޒީ ވިދާޅުވި އެވެ. އަދި އެ ދުވަހު އޭނާގެ ހެކިބަސް ނެގުމަށްފަހު ވަރަށް އަވަހަށް މައްސަލަ ނިންމަވާނެ ކަމަށް ވެސް ގާޒީ ވިދާޅުވި އެވެ.