ފަނޑިޔާރުންނަށް ބިރު ދެއްކުމަކީ ކުށެއް ކަމަށާއި ހުކުމާ މެދު ހިތްހަމަ ނުޖެހޭ ނަމަ އިސްތިއުނާފް ކުރުމަށް ތިމަރަފުށީ ދާއިރާގެ މެމްބަރު އަބްދުﷲ ރިޔާޒް، އިދިކޮޅަށް އިލްތިމާސް ކުރައްވައިފިއެވެ.
ކުރީގެ ރައީސް ޔާމީނަށް އުފުލާފައިވާ މަނީ ލޯންޑަރިންގެ ދައުވާ އެމަނިކުފާނުގެ މައްޗަށް ސާބިތުވާ ކަމަށް ކްރިމިނަލް ކޯޓުގެ ފަސް ފަނޑިޔާރުންގެ ބެންޗުގެ އިއްތިފާގުން މިއަދު ނިންމައި، ފަސް އަހަރު ދުވަހުގެ ޖަލު ހުކުމަކާއި އެކު ފަސް މިލިއަން ޑޮލަރުން ޖޫރިމަނާ ކުރުމުން ޕީއެންސީގެ ރައީސް އަބްދުއްރަހީމް އަބްދުﷲ ވަނީ ފަސް ފަނޑިޔާރުން ވެސް ޖަލަށް ލާނެ ކަމަށް ބުނެ އިންޒާރު ދީފައެވެ.
ޔާމީނަށް ހުކުމްކުރި އިރު އަދުރޭއާއެކު އިދިކޮޅު ސަޕޯޓަރުން ވަނީ ކޯޓު ސަރަހައްދަށް އެއްވެފައެވެ. ހުކުމަށް ފަހު އަދުރޭ ވަނީ ޔާމީން މިނިވަން ނުވަނީސް ކުރާ މަސައްކަތް ހުއްޓާ ނުލާނެ ކަމަށް ވިދާޅުވެފައެވެ.
ފަނޑިޔާރުންނާ ގުޅޭ ގޮތުން ދަށު ދަރަޖައިގެ ބަހުން މުޚާތަބު ކުރުމަށް ފަހު އަދުރޭ ވަނީ ފަސް ފަނޑިޔާރުން ވެސް، އެބޭފުޅުންގެ ވެރިކަމެއްގައި ޖަލަށް ލާނެ ކަމަށް ބުނެފައެވެ.