ފަސް އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް އަބްދުﷲ ޔާމީނަށް އިދިކޮޅު ކޯލިޝަންގެ ރިޔާސީ ޓިކެޓު ދޭން ފާސްކޮށްފިއެވެ.
ބުރާސްފަތި ދުވަހު ކްރިމިނަލް ކޯޓުގައި ބޭއްވި ޝަރީއަތުގެ މަޖިލީހުގައި ޔާމީނަށް އުފުލާފައިވާ މަނީ ލޯންޑަރިންގެ ކުށް ސާބިތުވެ ފަސް އަހަރު ދުވަހަށް ޖަލަށް ލުމަށާއި ފަސް މިލިއަން ޑޮލަރުން ޖޫރިމަނާ ކުރުމަށް ވަނީ ހުކުމް ކޮށްފައެވެ.
ހުކުމާއެކު ރައީސް ޔާމީން މިހާރު މާލެ ޖަލު ބަންދުގައި ހުންނެވިއިރު އިދިކޮޅުން ވަނީ ޔާމީން މިނިވަން ނުވަނީސް ކުރާ މަސައްކަތް ހުއްޓާ ނުލާނެ ކަމަށް ބުނެފައެވެ.
ޔާމީނު ބަންދުގައި ހުރިއިރު އިދިކޮޅުން ރޭ ބޭއްވި ކައުންސިލް ބައްދަލުވުމެއްގައި އެމަނިކުފާނަށް 2023 ވަނަ އަހަރު ބާއްވާ ރިޔާސީ އިންތިޚާބުގައި އިދިކޮޅު ކޯލީޝަންގެ ޓިކެޓު ދޭން ހުށައެޅީ ކުރީގެ ހޯރަފުށީ ދާއިރާގެ މެމްބަރު މުހައްމަދު އިސްމާއީލެވެ. އޭނާގެ ހުށައެޅުމަށް ތާއީދުކުރީ ނައިފަރު ދާއިރާގެ މެމްބަރު ޝިޔާމެވެ.
ރޭގެ ކައުންސިލް ބައްދަލުވުމުގައި އިދިކޮޅުން ވަނީ ޔާމީނަށް އިއްވި ހުކުމް ބަލައިނުގަނެ، މަދަނީ ބަސްނޭހުމަކަށް ދިއުމަށް ނިންމާފައެވެ.
ހުކުމް ތަންފީޒު ކުރުމަށް މާފުށީ ޖަލަށް ބަދަލުކުރުމުގެ ކުރިން ޔާމީން މިހާރު ހުންނެވީ މާލޭ ޖަލުގައެވެ. ބައެއް ޓެސްޓުތައް ހެދުމަށް އިއްޔެ އެމަނިކުފާނު ވަނީ އައިޖީއެމްއެޗަށް ގެންގޮސްފައެވެ. ރައީސް ޔާމީންގެ ފަރާތުން ކްރިމިނަލް ކޯޓުން އިއްވި ހުކުމް އިސްތިއުނާފު ކުރުމަށް މިހާރު ވަނީ ނިންމާފައެވެ.