ނޯޓް: މިއީ އަހުމަދު ނާސިހު ތަރުޖަމާ ކުރައްވާފައިވާ ލިޔުމެކެވެ. މި ލިއުން މި ގެނެސް ދެނީ ބައިތަކަކަށް ބަހާލައިގެންނެވެ.
(ޖުލައި 11، 2013 ވަނަ ދުވަހުގެ ބަޔާ ގުޅޭ)
މި އާޔަތްތައް އަޅުގަނޑުމެންނަށް އަންގައި ދެނީ "ނަވާރަ" މި އަދަދު މާތްﷲ ކަނޑައަޅުއްވާފައި ވަނީ، ޤުރުއާނަކީ މާތްﷲ ގެ ފޮތްކަމާއި އަދި އެފޮތުގެ ޞައްޙަކަން ސާބިތުކޮށް ދެއްވުމުގެ މުޢުޖިޒާތެއްގެ ގޮތުގައި ކަމެވެ.
މާތްﷲ ގެ ތައުފީޤާއެކު އަޅުގަނޑު ކުރުގޮތަކަށް ޤުރުއާނުގެ މުޢުޖިޒާތްތަކުގެ ތެރެއިން ތަންކޮޅެއް ބަޔާންކޮށްދެވޭތޯ ބަލަމެވެ. އަޅުގަނޑުމެނަށް ކުރެވޭނެހާ ވެސް ކަމަކީ މިފަދަބޮޑު ކަނޑަކުން ކުޑަކުޑަ މިންވަރެއް ހޮވާލުމެވެ.
ޤުރުއާނުގެ މުޢުޖިޒާތް ބަޔާން ކުރުމުގައި މުޅި އިންސާނިއްޔަތާއި ޖިންނިން އެކުވެގެން މަސައްކަތް ކުރިކަމުގައި ވިޔަސް ފުރިހަމަ އަށް ބަޔާން ކުރުމަކީ ކުޅަދާނަވެގެންވާ ކަމެއް ނޫނެވެ.
* ބައެއް ޙަޤީޤަތްތައް:
ޤުރުއާނުގައި ހިމެނެނީ 114 ސޫރަތެވެ. އެއަދަދު 6 އިން ގެއްލުމުން އަންނަ ޖަވާބަކީ 19 އެވެ. (114=6×19) ޤުރުއާނުގައި ހިމެނޭ އެންމެ ފުރަތަމަ ސޫރަތަކީ އަލްފާތިޙާ އެވެ. އެސޫރަތުގެ އެންމެ ފުރަތަމަ އާޔަތަކީ ބިސްމި އެވެ. އެއީ بسم الله الرحمن الرحيم އެވެ.
ބިސްމީގައި އެކުލެވިގެންވާ އަލިފުބާގެ އަކުރުތަކުގެ އަދަދަކީ 19 އެވެ.ބިސްމީގައި ހިމެނެނީ 4 ލަފްޒެވެ. ފުރަތަމަ ލަފްޒު ކަމުގައިވާ ”ބިސްމި” މިލަފްޒު އުފެދިފައިވަނީ ޢަރަބި ބަހުގެ ”އިސްމު” މިބަހުންނެވެ. އަދި ”އިސްމު” މިބަސް ޤުރުއާނުގައި އައިސްފައިވަނީ މުޅިއެކު 19 ފަހަރު އެވެ.
ބިސްމީގައި ހިމެނޭ ދެވަނަ ލަފްޒަކީ ﷲ އެވެ. އެލަފްޒު ޤުރުއާނުގައި މުޅިއެކު 2698 ފަހަރު އައިސްފައިވެއެވެ. އެއަދަދު142 އިން ގެއްލުމުން ޖަވާބަކީ 19 އެވެ. (2698=142 19)
ބިސްމީގައިވާ ތިންވަނަ ލަފްޒު ”އައްރަޙްމާން” ޤުރުއާނުގައި އައިސްފައިވަނީ 57 ފަހަރު އެވެ. އެއަދަދު 3 އިން ގެއްލުމުން ޖަވާބަކީ 19 އެވެ. (57=3 19)
ބިސްމީގައިވާ ހަތަރުވަނަ ލަފްޒު ”އައްރަޙީމް” ޤުރުއާނުގައި އައިސްފައި ވަނީ 114 ފަހަރު އެވެ. އެއީ 19 ގުނަކުރަން 6 އެވެ. (114=6×19) ބިސްމީގައި ހިމެނޭ ހުރިހާ ލަފްޒު ތައް ޤުރުއާނުގައި ހިމެނިފައިވާ އަދަދުތައް 19އިން ގެއްލި ހުސްވާގޮތަށް ވުމުން އެކަމުން ސާބިތުވަނީ އެއީ ހަމައެކަނި އިއްތިފާގެއް ނޫންކަމެވެ.
ޤުރުއާނުގައި ހިމެނޭ އާޔަތްތަކުގެ އަދަދަކީ 6346 އެވެ. އެއީ 19 ގުނަކުރަން 334 އެވެ. (6346=334 19)
އަދި 6346 ގައި ހިމެނޭ ހުރިހާ ނަމްބަރުތައް އެއްކުރުމުންވެސް ނިކުންނަ ނަތީޖާއަކީ 19 އެވެ. އެއީ (19=6+4+3+6)
ޤުރުއާނުގައި ރަމްޒު އަކުރުތަކަކުން ފެށޭ 29 ސޫރަތް ވެއެވެ. އެއީ އެސޫރަތެއްގެ ފުރަތަމަ އާޔަތް ފެށޭއިރު އަލިފުބާގެ އަކުރު ތަކަކުން ފެށިފައި ވުމެވެ. މިއަކުރުތައް ވަނީ 1 އަކުރުން ފެށިގެން 5 އަކުރުގެ ކޮމްބިނޭޝަނަކަށް ވާގޮތަށެވެ. އަދި މިކަމަށް ބޭނުން ކުރެވިފައިވަނީ ތަފާތު 14 އަކުރެކެވެ.
(ނުނިމޭ)